O Concello de Moraña e os sectores da hostalaría e a restauración van iniciar as actividades gastronómicas da 51ª Festa do Carneiro ao Espeto o sábado 11 de xullo coa novena edición da iniciativa Espétalle un Pincho, que nesta ocasión estreará formato cunha novidosa degustación de petiscos na Carballeira de Santa Lucía.
Esta cuestión e outras referidas á exaltación gastronómica deste ano, que vai ter bastantes cambios e restriccións, como a supresión da comida popular, por cuestións sanitarias, foron abordadas este xoves pola alcaldesa, Luisa Piñeiro, e os concelleiros José Cela e María José García, nunha xuntanza cos hostaleiros e restauradores de Moraña celebrada na Casa da Cultura.
Na mesma, acordouse que Espétalle un Pincho cambie o seu formato, xa que terá lugar en horario de tarde-noite e ao aire libre con casetas, unha por establecemento participante, e con colaboración por parte do Concello, que aportará o produto e encargarase da promoción entre a veciñanza.
A alcaldesa deixou claro que primará o criterio sanitario sobre o lúdico.