Centos de nenos e nenas do municipio da Estrada saíron este mércores á rúa para reivindicar o dereito dos galegos e galegas a vivir na nosa propia lingua. Esta carreira puxo o colofón a todas as celebradas por toda a provincia en defensa do idioma.
Baixo o lema Na casa, na escola, bota a lingua fóra, e con distintas pancartas con lemas escritos que promoven o uso da lingua galega, e incluso coas súas linguas pintadas de azul, centos de alumnos e alumnas dos centros educativos estradenses percorreron as rúas da capital de Tabeirós-Terra de Montes, algúns deles chamando a atención da veciñanza con distintos instrumentos, como pandeiretas.
En concreto, foron nove os centros escolares que participaron nesta carreira pola lingua: o IES Nº 1, o Antón Losada, o CEIP Pérez Viondi, o Figueiroa, o CEIP O Foxo, o Manuel Villar Paramá, o Cabada Vázquez e Oca. Ademais, de Forcarei tamén participou o IES Chano Piñeiro.
Nunha xornada no que afortunadamente o bo tempo acompañou ao alumnado na súa camiñata, leuse un manifesto, repartíronse diplomas e os pequenos e pequenas gozaron do concerto de Mekánica Rólling Band.
