Un operario resultou ferido este venres ao sufrir unha caída no seu posto de traballo en Valga.
O accidente tivo lugar ás 15.30 horas e foi un particular o que chamou ao 112 Galicia para solicitar asistencia médica para un albanel ferido após caer dunha altura duns cinco metros.
O accidente ocorreu cando o home traballaba no tellado dunha vivenda no lugar de Magariños, na parroquia de Setecoros.
O 112 deu aviso aos profesionais de Urxencias Sanitarias de Galicia-061, que informaron da mobilización do helicóptero medicalizado con base en Santiago para atender o ferido, pero, finalmente, o operario foi trasladado en ambulancia até o centro hospitalario de referencia.
Co fin de prestar apoio ao equipo médico, desde o 112 pasouse aviso tamén aos axentes da Garda Civil, da Policía Local e aos efectivos de Protección Civil da localidade.
