O vindeiro venres día 9 do presente mes, ás 20 horas no Museo Municipal, no marco da programación de decembro e con participación aberta, o Concello de Lalín promove un relatorio sobre o ilustre lalinense Benito Varela Jácome en homenaxe a súa persoa e obra que será ofrecido polo seu ex alumno Ángel Núñez Sobrino, que é autor de numerosos traballos de investigación en diversos campos, entre eles o da arqueoloxía.
Núñez Sobrino tivo a Benito Varela Jácome como mestre de Literatura en COU, no instituto Xelmírez de Santiago, e mantivo relación co homenaxeado ao longo de dúas décadas. O título da charla fará gala precisamente a este aspecto e titularase "Trato e influencia en don Benito Varela Jácome". Acompañará o seu relatorio dalgunhas ilustracións con libros do ilustre profesor, separatas, monografías e entrevistas do seu arquivo persoal.
Con esta actividade trátase de divulgar entre os lalinenses a figura deste erudito e recoñecido lingüista nacido en 1919 en Viñoa (Soutolongo) e falecido en 2010 en Santiago, que chegou a ser un dos veciños destas terras máis recoñecidos no mundo das letras españolas grazas aos seus estudos sobre literatura hispanoamericana, española e galega. Benito Varela Jácome publicou libros sobre Rosalía de Castro, Alfonso Daniel Rodríguez Castelao e Álvaro Cunqueiro. Ademais foi un dos máis ferventes estudosos da obra da multifacética Emilia Pardo Bazán.
Profesor primeiro da Universidade Complutense e despois catedrático de Literatura Hispánica na Universidad de Santiago de Compostela, exerceu moitos anos como presidente da Asociación Española de Estudos Literarios Hispanoamericanos.
O Concello de Lalín deulle o seu nome a súa biblioteca municipal en maio de 2002 pola súa contribución á cultura galega. Nese momento dixo que de todas as homenaxes que lle renderan na súa prolífica carreira literaria centrada na investigación, a máis importante é a que lle fixeron ena súa terra natal nomeando á biblioteca na que iniciou as súas tardes de estudos –comezou a súa formación de Bacharelato en Lalín– como biblioteca municipal Varela Jácome.