Lalín remata o programa 'Coñece o teu Concello' dirixido aos máis cativos

A iniciativa pretende poñer en valor e dar a coñecer os recursos locais aos máis pequenos
Un dos grupos partipantes nas xornadas educativas. DP
photo_camera Un dos grupos partipantes nas xornadas educativas. DP

Lalín vén de rematar o programa turístico e educativo Coñece o teu Concello, financiado integramente polo Concello e dirixido a valorar e dar a coñecer os recursos locais aos máis cativos. Nesta segunda edición, e seguindo a liña dos resultados do primeiro ano, a iniciativa tivo unha repercusión moi positiva.

A concelleira delegada Begoña Blanco indica que todos os axentes implicados (colexios, Anpas, profesorado...) coinciden no produtivas que son estas xornadas educativas de coñecemento do entorno municipal e dos recursos turísticos. "Ponse de manifesto a importancia do turismo educativo e da importancia do contacto coa natureza, co medio no que viven, do descubrimento do noso territorio, explorando a nosa oferta turística para adquirir novos coñecementos culturais, artísticos ou gastronómicos, a través de actividades tanto no entorno urbano coma na natureza, neste caso, no ámbito municipal", sinala.

As visitas contemplaron os seguintes puntos: Castro Tecnolóxico, Castro Deza, Museo Ramón Aller, Pazo Liñares, Museo Galego da Marioneta e o Xoguete, Museo Casa do Patrón, Área Recreativa de Mouriscade, Fraga de Catasós e Carballeira do Rodo.

Mediante este programa conséguese: Coñecemento e valoración dos recursos turísticos municipais; ofertar diversas actividades lúdicas relacionadas co turismo educativo no termo municipal; concienciación medio ambiental, ecolóxica e fomento do turismo sostible; ademáis de implicar na educación turística e na valoración de recursos tamén aos pais dos cativos.

Comentarios