O Concello de Lalín, a través das Concellerías de Igualdade e Comercio, vén de convocar o XV Premio ás Mulleres Dna. Maruja Gutiérrez 2021, con motivo do 8 de marzo, Día Internacional das Mulleres. O prazo de presentación de candidaturas empezará ao día seguinte da publicación do extracto da convocatoria no Boppo e rematará o luns 22 de febreiro.
Este premio ten por obxecto visibilizar e distinguir a profesionalidade, capacidade de iniciativa empresarial e traxectoria persoal e social das mulleres. Trátase duns galardóns que "naceron a fin de promover a transformación de estereotipos sexistas e rachar coas situacións de discriminación por razón de xénero, así como para estimular e recoñecer o esforzo e a traxectoria de mulleres que están desenvolvendo un labor importante no ámbito da igualdade de oportunidades, a fin de que sirva de exemplo para a sociedade e referente para as novas xeracións".
As persoas interesadas en propoñer unha candidatura ou optar a este galardón deberán remitir as candidaturas ao Rexistro Xeral do Concello de Lalín, aínda que tamén poderán enviarse por correo electrónico a [email protected], indicando no asunto XV Premio ás Mulleres Dna. Maruja Gutiérrez. As ditas candidaturas deberán achegar a ficha que se xunta como anexo I na orde publicada no Boppo e proporcionar datos suficientes que permitan recoñecer á candidata, así como un breve currículo e/ou historia de vida e as razóns polas que considera que é merecedora deste premio.
Poderán optar ao premio empresarias con independencia da forma xurídica da súa empresa e con domicilio social en Lalín e mulleres ou asociacións/colectivos que destaquen pola súa traxectoria tanto profesional como persoal ou no eido social.
