miércoles. 27.01.2021 |
El tiempo
miércoles. 27.01.2021
El tiempo

Sabucedo recibe cabalos de Forcarei

Os cabalos que chegaron ao novo centro de acollida de Sabucedo procedentes de Forcarei. CEDIDA
Os cabalos que chegaron ao novo centro de acollida de Sabucedo procedentes de Forcarei. CEDIDA
Seis equinos salvaxes identificados da Rapa das Bestas e un máis sen dono coñecido pasaron ás instalacións do novo centro de acollida que puxo en funcionamento a asociación estradense

A iniciativa lanzada pola alcaldesa de Forcarei, Verónica Pichel, xunto coa Asociación Rapa das Bestas para derivar os cabalos mostrencos a un novo centro de acollida en Sabucedo, está dando os seus primeiros froitos. Seis bestas da propia asociación foron devoltas a esta entidade e unha máis, sen dono coñecido, pasou tamén ao seu cargo ao tempo que se abriu o período preceptivo de reclamacións.

Hai nove meses a Xunta abriu a porta a esta idea, confirmando a autorización para a habilitación desas instalacións para equinos salvaxes en Sabucedo. Dende aquela e unha vez activado de xeito efectivo o procedemento, recibíronse no Concello de Forcarei varios avisos veciñais sobre a presenza de cabalos sen control nas inmediacións de fincas privadas, aínda que as dificultades para capturalos, multiplicadas polas limitacións derivadas das medidas de contención do coronavirus, complicaron moito o proceso.

Nas últimas datas conseguiuse prender a sete equinos, confinados inicialmente nunha parcela particular do lugar de Carballeira. De alí foron derivados ao centro de acollida de Rapa das Bestas. Segundo comprobou a Garda Civil, un deles non tiña microchip e non puido identificarse ao seu propietario, polo que se activou o procedemento para constatar se existía ou non. A reactivación do servizo de retirada de gando mostrenco data de marzo de 2020, despois de que tan só funcionara durante uns poucos meses no anterior mandato. A administración de Verónica Pichel decidiu contratar para esta iniciativa a un profesional.

Co procedemento tradicional, cando unha persoa comunicaba ao Concello a aparición dun cabalo salvaxe, o responsable do servizo acudía a recollelo e o gardaba temporalmente nun recinto. A continuación a Garda Civil trataba de identificar ao animal e emitía un bando. Se ninguén reclamaba a propiedade nun período de tempo determinado, o Concello tiña tres posibilidades segundo a normativa vixente: levalo directamente ao matadoiro, levalo a poxa ou entregalo a un centro de acollida.

O obxectivo de Pichel co acordo coa Asociación Rapa das Bestas era precisamente evitar que os cabalos mostrencos acabaran sacrificados. Por iso puxo ao fronte do servizo a unha persoa dun determinado perfil e decidiu apostar pola colaboración pioneira co colectivo de Sabucedo.

Sabucedo recibe cabalos de Forcarei
Comentarios