A Semana Verde celebrará unha edición especial do 3 ao 5 de setembro

Os expositores abogan por pospoñela para que o evento se realice con maiores garantías sanitarias
Imaxe de arquivo dunha edición pasada da Semana Verde de Silleda. PATRI FIGUEIRAS
photo_camera Imaxe de arquivo dunha edición pasada da Semana Verde de Silleda. PATRI FIGUEIRAS

A 43ª edición da Feira Internacional Abanca Semana Verde de Galicia e os seus certames paralelos manteñen a súa celebración neste ano 2021, aínda que se trasladan das súas datas habituais a principios do mes de xuño para levarse a cabo do 3 ao 5 de setembro.

Nos últimos meses a Fundación Semana Verde de Galicia estivo traballando intensamente nesta convocatoria, que como todas as actividades destes últimos tempos está condicionada pola covid-19, podendo constatar un gran respaldo por parte dos expositores, que foron transmitindo á organización o seu interese en participar, aínda que sempre vinculado a que a evolución da situación sanitaria o permitise.

Así, tendo en conta a situación actual, os expositores consideran de forma xeneralizada que a data na que estaba previso celebrar o certame, do 3 ao 6 de xuño, estaría demasiado próxima para realizar un evento coas características desta feira multisectorial con gran asistencia de expositores e público. E entenden que o traslado ao mes de setembro é a mellor decisión posible, xa que podería permitir que o certame se desenvolvese cunhas maiores garantías, tanto no número de empresas e entidades participantes como na confianza do público que acuda á cita.

Neste sentido, os expositores expresaron maioritariamente á Fundación a súa intención de participar en setembro e aproban a proposta de que o evento conte cunha duración de tres días en lugar de catro, dado que será unha edición especial, con características axustadas á situación actual.

UNHA FEIRA SEGURA. O equipo da Fundación implicado na organización da 43ª Abanca Semana Verde de Galicia xa está a traballar no deseño e planificación do evento, adaptando o seu formato e as súas actividades, para priorizar ante todo a satisfacción e a seguridade de todos os expositores e asistentes.

Comentarios