O Concello de Silleda, a través do departamento de Obras e Servizos que dirixe Antonio Ferro Losada, vén de acondicionar unha zona de estacionamento na parroquia de Piñeiro. Operarios municipais traballaron nos últimos días nas tarefas de acondicionamento desta área, situada preto da igrexa e o cemitero parroquial.
Estes terreos, que xa se viñan utilizando por parte da veciñanza como zona de estacionamento, acondicionáronse con zahorra para mellorar as condicións de acceso das persoas usuarias. "Era unha actuación moi demandada pola parroquia", indica o concelleiro de Obras que se achegou ata o lugar para supervisar os traballos.
Por outra banda, o equipo de bacheo municipal, dependente do mesmo departamento, continúa estes días actuando en distintos puntos do municipio. O equipo incorporou a 4 persoas como operarias a mediados do pasado mes de abril, con cargo á liña 3 do Plan Concellos da Deputación de Pontevedra, para o fomento do emprego.
A través deste plan tamén se incoroporaron outras 4 persoas ao servizo de limpeza viaria municipal e unha administrativa nas oficinas xerais. O equipo de bacheo realizou nos últimos días actuacións en varios puntos de Chapa, Parada e Oleiros, entre outros.
CAMPUS. Silleda volve ser, por segundo ano consecutivo, unha das sedes do campus deportivo de verán organizado polo Deportivo da Coruña. O campus terá lugar no estadio da Gandareira do 12 ao 16 de xullo, en horario de mañá, e está dirixido a todos os nenos e nenas do municipio de entre 6 a 16 anos. As inscricións xa poden realizarse a través da web deporcampus.rcdeportivo.es.
