A Consellería de Medio Ambiente, Territorio e Vivenda vén de aprobar definitivamente a modificación puntual número 1 do Plan Xeral de Ordenación Municipal (PXOM) do Concello de Valga.
Esta modificación foi tramitada polo Goberno Local co obxectivo de permitir a ampliación das instalacións da empresa Extrugasa dentro do termo municipal e, deste xeito, a través dela, favorecer a expansión industrial de Valga, o impulso da actividade económica e a xeración de postos de traballo para a poboación local.
O cambio no PXOM conleva a eliminación dun tramo do sistema viario, e afecta a unha superficie de 265.589 metros en Forno-A Torre
A modificación afecta a unha superficie de 265.589 metros cadrados situada entre as actuais instalacións de Extrugasa, a liña de ferrocarril e o núcleo do Forno-A Torre.
Conleva unha reordenación dos terreos e a eliminación dun tramo do sistema viario para posibilitar a ampliación da empresa de acordo ao convenio suscrito no ano 2016 entre o Concello e a entidade mercantil, precisamente para desenvolver urbanísticamente estes terreos clasificados como solo urbanizable delimitado de uso industrial no PXOM aprobado ano 2010.
A aprobación definitiva da modificación puntual foi publicada esta semana no Diario Oficial de Galicia. Con anterioridade fora aprobada inicialmente polo Pleno do Concello nunha sesión celebrada en setembro de 2017.
