A Xunta constata que o avance con seguridade nas obras do centro de saúde da Estrada, no que inviste 4,6 millóns de euros, permitirá que estea ao servizo dos veciños no verán.
A conselleira de Infraestruturas e Mobilidade, Ethel Vázquez, co director da Axencia Galega de Infraestruturas, Francisco Menéndez, mantivo este luns unha videoconferencia co alcalde da Estrada, José López, e co equipo responsable do proxecto para avaliar a evolución dos traballos e as medidas de protección sanitaria adoptadas por mor da Covid-19.
As obras deste centro de saúde reiniciáronse a mediados de mes tras a súa interrupción polo cese xeral de actividades non esenciais. Neste sentido, no encontro constatouse que os traballos se están a realizar coas necesarias medidas para evitar contaxios.
No que se refire ao avance do proxecto, a conselleira concretou que as obras progresan a bo ritmo e xa acadan o 75 % da súa execución total.
POSTOS DE TRABALLO. Ethel Vázquez salientou que darlle continuidade a este proxecto supón manter activo investimento público da Xunta na Estrada e, desa forma, garantir os 30 postos de traballo directos que están asociados á execución desta actuación.
Subliñou, ademais, "a aposta pola sanidade pública que vén realizando a Xunta, que reactivou nas últimas semanas infraestruturas sanitarias cun investimento de 90 millóns de euros e autorizou a licitación da primeira fase do Hospital de Montecelo, en Pontevedra, por 115 millóns", indicou a titular de Infraestruturas.
Así mesmo, concretou que co levantamento das restricións se retomaron as obras nunha decena de centros de saúde como o da Estrada, Milladoiro, Narón, Bouzas, Pereiro de Aguiar, Melide, Salceda de Caselas, Paderne de Allariz ou o do Barrio da Residencia, en Lugo.
Ademais a conselleira salientou, xunto a estes centros de saúde de distintos puntos da comunicade galega, a reactivación das obras de reforma e ampliación dos hospitais da Costa e de Ferrol.
A nova infraestrutura contará con tres andares, segundo recordou a conselleira de Infraestruturas, Ethel Vázquez, ademais de soto, cuxo acceso principal se realizará a través dunha praza exterior.
Tamén disporá dun acceso de ambulancias baixo teito.
Así mesmo, o edificio albergará consultas de medicina xeral, de enfermería, matrona, área pediátrica, zona de urxencias, sala de toma de mostras, de radioloxía e ecografía, entre outros servizos.
21.000 tarxetas sanitarias
Este novo centro de saúde atenderá unha poboación con case 21.000 tarxetas sanitarias, das que 2.300 corresponden a atención pediátrica, segundo concretou a Xunta de Galicia.