En Soutomaior é tempo de cábalas. PP e BNG quedaron tan axustados nos anteriores comicios que é normal que todos pensen en se haberá un cambio. Cal é a súa?
O resultado será axustado, por suposto, pero son optimista. Non vexo peor ambiente que hai catro anos e a sensación que teño é que podemos revalidar a maioría. Pero nós temos en conta aos rivais, sobre todo ao BNG.
No 2019 o descalabro do PSOE deixou a soas ás dúas grandes marcas e houbo un bipartidismo real nos plenos. Como foi o mandato?
Foi tranquilo. Houbo manifestacións convocadas polo BNG pola Sanidade e eu comparto plenamente que en Soutomaior temos un problema real coa Sanidade. Estamos traballando para iso coa Xunta, porque non é competencia municipal. Non foron as decisións do Goberno local as que causaron a controversia no concello.
Puideron traballar nas súas áreas enseña? En cales se avanzou?
O primeiro tramo do mandato marcouno a pandemia, na que fixemos un bo labor, desde os maiores ata os nenos que precisaban que lles levaran os deberes á casa. A partir de aí, pasada a crise sanitaria, o obxectivo tivo que ser seguir axudando ás familias vulnerables. Despois estivemos traballando en infraestruturas importantes. Humanizamos o Multiusos, o campo da feira, o campo de San Benito... No deporte tamén actuamos como sempre, coas actividades e coas infraestruturas, construimos unha nova pista de pádel cuberta.
E de aí sairá parte do seu traballo se revalida como alcalde?
É prioritario e temos que sacar adiante a nova EDAR, que leva ano e medio pendente dun permiso de Costas. Se non fora por iso estaría xa en execución. E estamos coas expropiacións para o centro de saúde, que permitirá traer novos profesionais.
Leva 28 anos como alcalde, como se seguen ideando proxectos estrela? Ten moitos plans de futuro?
Temos cinco. Os máis avanzados son a EDAR e o Centro de Saúde. O seguinte sería o gran parque e xardín na parte traseira do Consistorio, converténdo o espazo nunha gran área verde. O cuarto sería ampliar as dotacións deportivas con área fitness para o pavillón, e por último, a rehabilitación do colexio de Oliveira. Será un centro cívico e social e viveiro de empresas. Eses son os cinco obxectivos, pero en primeiro lugar están as persoas: Servizos Sociais, Deporte, Xunventude e Muller.
Somos o segundo concello que máis creceu en Pontevedra. Un 40% nos últimos 20 anos. Non pode ser por casualidade"
O debate dos indicadores económicos de Soutomaior, ten sentido para vostede?
Non. Somos o segundo concello que máis creceu en Pontevedra. Un 40% nos últimos 20 anos. Non pode ser por casualidade. Non serve dicir que estamos entre Pontevedra e Vigo, porque tamén o están Vilaboa, Redondela e Ponte Sampaio e decrecen. O PIB per cápita é malo en Soutomaior? Pero é normal, se somos un concello no que hai tanta xente xoven. Nenos e nenas en cada familia. A renda per cápita realízase dividindo a renta familiar entre o número de membros. Se mira a renda familiar a cousa é diferente.
O asunto do IES sacoulle o sono?
Co IES están contentos pais e nais. Fíxose para os nenos de Soutomaior e, se ben vai pasar por un pico de tensión este ano próximo, atendendo á natalidade, só hai que ver as matrículas dos colexios nos seguintes anos para saber que será suficiente. Outra cousa é que en Vilaboa decidiran que este lles quedaba máis cerca e pidan praza. En todo caso só lle vexo cousas boas ao IES. Deulle vida e axudará a transformar a zona de equipamentos da Montesiña.