Nito Sobral, o alcalde de Poio e candidato por sexta vez á Alcaldía é o método máis seguro para que a veciñanza continúe "no camiño de aproveitar as grandes potencialidades" que ten Poio. Son palabras de Ana Pontón, voceira nacional do BNG, que este luns acudiu á posta de longo da lista de Sobral no Casal de Ferreirós, en San Salvador. Os xardíns deste pazo, na parroquia máis poboada do concello, ían acoller a visita da líder do partido nos prolegómenos dos comicios municipais, pero a choiva obrigou a celebrar o encontro no interior do Casal.
"O BNG, cando goberna, fai unha xestión transparente e honesta e aplica medidas que son referencia para a política municipal galega e recoñecida internacionalmente"
Ana Pontón, que compareceu nun acto que abriu a número dous e responsable actual de Educación e Deportes, Marga Caldas, lembrou que o día 26 de maio será unha cita importante para decidir quen vai dirixir e xestionar o concello e avogou pola valía para esta tarefa de Sobral e "da candidatura do BNG, conformada con xente nova que vén con ganas de dar o mellor e con ideas e coñecemento do concello".
Para Pontón, o mellor "aval" nestas eleccións municipais é o traballo realizado polo BNG nos concellos como de Poio, con políticas sociais, culturais e deportivas ao que sumou melloras en ámbitos destinadas sempre ás persoas. "O BNG, cando goberna, fai unha xestión transparente e honesta e aplica medidas que son referencia para a política municipal galega e recoñecida internacionalmente", afirmou para enxalzar o carácter e o talante do candidato. "Nito Sobral é un home ao que non lle gusta a crispación e sempre escolle escoitar e traballar polo ben común", declarou, para lembrar que "leva demostrado un grande compromiso con Poio, e co gran potencial do concello, o seu mar, os seus recursos e a paisaxe". Ante isto, defendeu, o 26M debe ser momento de "facer unha aposta clara para que non se produza ningún retroceso e estou convencida de que Poio vai estar aí".