A Consellería de Infraestruturas e Vivenda anunciou este luns a aprobación do proxecto de construción do alargamento e mellora da estrada PO-230, no concello de Cerdedo-Cotobade.
A actuación ten por finalidade mellorar a seguridade viaria dun treito de 1,8 quilómetros desde o núcleo de Serrapio ata o punto final da estrada, na intersección coa Nacional 541, en Vichocuntín.
TRABALLOS. As obras previstas comprenden a ampliación da calzada ata acadar un ancho de 7 metros (actualmente ten entre 5 e 5,5 metros) e a rectificación de varias curvas para mellorar o trazado da estrada. Actuarase ademais na drenaxe da plataforma, prevendo tamén o tendido e revestimento das gavias de seguridade.
Así mesmo, está previsto construír muros de contención nos puntos necesarios e renovar a sinalización horizontal, vertical e de balizamento.
Con estes traballos mellorarase a seguridade viaria e a comodidade na circulación dos usuarios desta vía.
INVESTIMENTO. Será precisa a expropiación de 26 fincas para acometer as obras, que se desenvolverán entre os puntos quilométricos 12+650 e 14+430 da estrada autonómica que conecta Campolameiro e Vichocuntín.
A Xunta prevé licitar nas vinderias semanas estes traballos por un importe de 610.000 euros, aos que deben sumarse os 6.350 nos que se estima o custo das expropiacións.