A xerente do Servizo Galego de Saude, Estrella López Pardo, acompañada do xerente da área sanitaria de Pontevedra, José Flores, e da directora de Atención Primaria desta área, Marta Ocampo, realizou o martes dúas visitas técnicas aos centros de saúde de Arcade e Vilaboa. Estes encontros co persoal, tal e como indicou o xerente, "forman parte da axenda de traballo semanal" dos responsables da área. Neles avalíanse os distintos plans de traballo e abórdanse os posibles problemas de cara a mellorar o funcionamento de cada centro.
No caso do de Vilaboa, os responsables do Sergas destacaron que se trata dun dos centros que conta con todo o persoal, incluídas as prazas de Pediatría, algo que fai que, en palabras do xerente, "sexa exemplar" en canto ao seu funcionamento. José Flores Arias lembrou que na comarca hai pendentes de construción "en distintas fases do proceso" novos centros de saúde para Barro, Poio e Soutomaior. Asemade, na Lama, "onde o centro ten máis de 40 anos e era unha antiga escola", existe o compromiso de buscar un terreo para un novo consultorio médico.
