A Asociación de Pais e Nais (ANPA) do CEIP Pedro Antonio Cerviño de Campo Lameiro fixo pública a súa preocupación ante a posibilidade de que se vexa "aínda máis" reducido o número de profesores que desempeñan as súas funcións educativas no centro escolar.
A ANPA asegura nunha carta remitida ao xefe territorial da consellería de Educación, César Pérez Ares, que a súa resignación se estende no tempo. O colexio Pedro Antonio Cerviño leva anos experimentando as consecuencias da súa ubicación nun municipio rural, privando aos seus alumnos dunha "educación dende a igualdade de oportunidades".
A pesar de que os pais e nais sempre se amosaron "comprensivos" coa limitación e reasignación do persoal docente, piden un "esforzo" por parte da administración autonómica para dotar aos cativos dunha "calidade educativa". É por iso que a Asociación solicita que o número de profesores se manteña, pois xa foi reducido durante o pasado curso escolar.
"Os alumnos de 1º e 2º de primaria, así como os de 3º e 4º reuníanse nunha mesma aula, incluso compartindo mestres con outros centros educativos da zona", denuncia a presidenta do ANPA San Miguel, Yolanda Fentanes Fontenla. De producirse a mesma situación a partires de setembro, engade, entraríase "nunha contradición severa" co distanciamento social e medidas de seguridade necesarias para afrontar o próximo curso no marco da "nova normalidade".
Coa finalidade de poder debater o tema, a ANPA do CEIP Pedro Antonio Cerviño solicita a convocatoria dunha reunión presencial con Pérez Ares para tentar chegar a un consenso e atopar "fórmulas alternativas que non perxudiquen o nivel de atención" aos alumnos do municipio.