As choivas asociadas á borrasca Karine deixaron este martes precipitacións acumuladas de máis de 55,5 litros por metro cadrado na localidade de Vilariño de Conso e máis de 42 litros por metro cadrado en Cotobade.
Así consta nos rexistros de Meteogalicia ata as 16.30 horas, nos que se constata que, en localidades con altitude menor de 900 metros, as precipitacións foron abundantes tamén nos concellos pontevedreses de Fornelos de Montes (máis de 41,5 l/m2), Poio (37,6) e Mondariz (34,9); así como no ourensano de Rubiá (34,4 l/m2).
En canto ás zonas altas da comunidade, a choiva caeu con forza en Pedrafita (42 litros por metro cadrado), Manzaneda (30,6) ou Muiños (30,4 l/m2).
PREVISIÓN. Este mércores Galicia continuará na influencia das baixas presións, polo que non se esperan cambios na situación meteorolóxica. Pola súa banda, as temperaturas mínimas experimentarán un lixeiro ascenso, mentres que as máximas seguirán sen cambios, polo que será un día de moi pouca oscilación térmica. Deste xeito, nas cidades galegas as máximas subirán até os 19 graos en Ourense, mentres que os valores mínimos descenderán até o dez graos en Lugo.
