martes. 26.01.2021 |
El tiempo
martes. 26.01.2021
El tiempo

Unha construtora de Poio leva 14 obreiros a Alemaña sen cartos nin contrato

Un dos traballadores desprazados a Alemaña pola empresa poiense.
Un dos traballadores desprazados a Alemaña pola empresa poiense.
Os operarios, que foron requeridos para a construción da infraestrutura de fibra óptica, denuncian "as pésimas condicións de aloxamento" que atoparon ao chegar  Tres deles esperan ser repatriados

"Isto acabará rebentando, aínda non sabemos se nos deixarán aquí tirados ou non", son as impresións de David Deus, un dos 14 traballadores que, tras coñecer a oferta de traballo "por un amigo", puxo rumbo a Alemaña esta semana coa construtora Camsoar SL, unha entidade de recente creación con sede en Poio. A oferta da empresa poiense prometía un salario de 3.500 euros limpos ao mes por dúas estadías de traballo na construción da infraestrutura para a instalación de rede de fibra óptica en áreas rurais do sur xermano, a primeira fase ata o 18 de decembro e a segunda, a partir do 10 de xaneiro.

A entidade mobilizou dúas furgonetas a principios desta semana que partiron de Vigo e da Coruña con destino a Alemaña, o que resultou ser todo un periplo que David Deus, como voceiro dos traballadores, narra aínda estupefacto. "Primeiro a min fixéronme pagar a PCR do meu bolsillo. En principio iamos saír o domingo pero pospuxérono. Avisáronnos con escasas horas de antelación. Prometeran darnos un adianto de 400 euros a todos os que iamos para alá, pero nunca chegou. Ao chegar a Burgos na furgoneta quedamos sen cartos. Fixeron unha transferencia de 300 euros que nos durou ata chegar a Francia. Alí mandaron outros 300 e dixéronnos que un tal Camilo nos esperaba en Alemaña. Mandáronnos unha localización, chegamos ao sitio ás cinco da mañá e alí non había ninguén", narra. O seguinte, foi descubrir que o aloxamento para todos os traballadores era unha casa "en pésimas condicións. Daban ganas de chorar", di. Escombros no pasillo, buracos nas paredes e colchóns sen roupa de cama foron as condicións de vivenda que atoparon. Aínda que a empresa realoxou aos traballadores ante as protestas, tres deles manifestaron a súa intención de volver á casa, debido ás malas condicións. "Dixéronnos que o pagaramos nós", explica Deus. Finalmente, a empresa acordou enviar unha furgoneta "que aínda estamos agardando" para devolver á casa aos tres operarios, que dende ese momento agardan ser repatriados. "Mandáronnos aquí sen cartos, e nin sequera chegamos a firmar ningún contrato", sinala o traballador.

A pesar disto, os 11 operarios restantes comezaron a traballar esta semana "sen contrato. Din que estamos dados de alta pero ninguén cobrou o seu. A un ingresáronlle 500 e a outro 200 euros, pero nada máis. Nin sequera hai ferramentas para facer o traballo, e as condicións esixen facer 100 metros en liña de zanxa ao día, pero ninguén é capaz de chegar a máis de 60. Dixéronnos que se marchamos, temos que pagarlle á empresa. Non hai furgoneta, nin adiantos, nin nada", conta o traballador.

A FCM-CIG fíxose eco da situación dos traballadores no rural do sur alemán e asegura que "Camsoar foi creada hai só dous meses", o que "fai sospeitar que foi creada específicamente para tentar executar un fraude nesta obra". Sinala a Rebeca Pousada e Camilo Leonardo Aguilar Romo (tamén administrador de ECJ Construcciones 2018 SL e do madrileño Centro Geriátrico Los Rosales SL) como empresarios que "poderían ser simples testaferros, ás ordes dunha terceira persoa, Jesús Fariña Calvo".

Unha construtora de Poio leva 14 obreiros a Alemaña sen cartos nin...
Comentarios