As palilleiras de Figueirido estarán esta fin de semana na carpa que se instalará en Riomaior para acoller a X Festa do Viño. As palilleiras farán unha exposición dos seus traballos no expositor da carpa que complementará a presenza en Riomaior dos artesáns locais. As casetas adquiridas polo Concello a finais do 2021 con motivo do primeiro Mercadiño de Nadal volverán acoller a Laura Filgueira con ERRE3; Carmen Castro con Cachiboreta e Alcrique cos seus produtos artesáns.
O programa da X Festa do Viño de Vilaboa, que terá lugar os días 6 e 7 de maio debaixo do viaduto de Riomaior, complétase deste xeito coa artesanía local.
Na citada explanada instalarase a carpa que acollerá os 10 postos nos que se unen adegas da IXP do Morrazo e dos colleiteiros locais que aproveitarán o evento para dar a coñecer a singularidade dos seus caldos.
Así, entre os adegueiros e adegueiras estarán Elisa Ruibal García, de Casa da Boullosa; Manuel Conde Conde; Manuel Collazo Fernández; Jesús Amoedo Leiro, de Casa da Torre; Manuel Rúa, de Casa Quinteiro e Martín Torres González , de Casa Cañoteira. Entre os caldos da IXP Ribeiras do Morrazo estarán Adega Ardán, de Marín, a poiense Adega Mosteiro de Poio e Adega Os Areeiros, de Vilaboa, así como e José Blanco Martínez, de Quinteiro de Sabela.
Os viños poderán degustarse nunha copa editada polo Concello para esta ocasión e serigrafada co logo da festa e que poderá adquirirse ao prezo de 3 euros, retornables en caso de devolvela en perfectas condicións.
Postos de comida, e tamén de doces, acompañarán aos viños. A programación iníciase o sábado de 12.00 a 00 horas e o domingo de 12.00 a 17.00 horas e na que a promoción dos caldos estará arroupada por actividades culturais e unha potente proposta musical, co concerto de Milladoiro ás 22.00 horas do sábado e a actuación do o grupo de gaitas Aires de Cobres ás 12.30 horas do domingo.
Tanto o alcalde, César Poza, como a concelleira de Dinamización, Carmen Gallego, confían en que a Festa do Viño de Vilaboa acade o mesmo apoio social que a Festa do Mar.