Extinguido o lume declarado na Puntada, en Poio

Preto das 9.00 da mañá deste domingo, Protección Civil de Poio informou dun incendio no lugar da Puntada, na parroquia de San Salvador. Dende o paseo da avenida de Marín, a columna de fume e as lapas eran visibles para os viandantes que paseaban por alí. A zona onde se produciu o lume era un espazo cheo de árbores preto da ría, nun lugar próximo á ponte que cruza a AP-9 entre Poio e Pontevedra. A rápida actuación dos efectivos fixo que as lapas non chegasen a ningunha vivenda das que se atopaban preto do lugar. 

Ata alí achegáronse sete voluntarios do equipo de Protección Civil de Poio, dúas brigadas de extinción da Xunta de Galicia e efectivos da Policía Local e da Guardia Civil. Preto das 11.30 horas, o persoal que traballaba na zona para sofocar as lapas certificaron que o incendio xa se atopaba controlado, aínda que os efectivos continuaron traballando na zona debido ao risco de altas temperaturas e a alerta laranxa que se activou nas Rías Baixas dende a unha do mediodía. 

O cambio na dirección do vento e as altas temperaturas fixeron que ao redor das tres da tarde o lume se reavivase. Isto ocasionou que a cidade de Pontevedra comezara a encherse dun forte olor a fume. 

Ao redor das seis da tarde e segundo informaron os voluntarios de Protección Civil do concello de Poio, o lume declarouse "controlado e extinguido". A pesar disto, da zona calcinada continuaba saíndo fume de varios conatos debido ás altas temperaturas que propiciaron a combustión do mato. 

Os equipos que extinguiron o lume estiman que se calcinou aproximadamente unha hectárea de terreo na que soamente se ocasionaron danos materiais. Fontes da Policía Local de Poio están a investigar se o lume puido ser provocado.

Tamén Ponte Caldelas sufriu este domingo a ameaza do lume, que nese caso puido sufocarse en pouco tempo. O incendio iniciouse na Reigosa, na parroquia de Tourón.