Exitoso regreso da Festa da Troita de Ponte Caldelas ao seu formato tradicional no que se puideron degustar as troitas na Alameda, houbo verbenas e actuacións musicais e se deixaron atrás as restricións da pandemia.
O Concello de Ponte Caldelas, e particularmente a Alameda convertiuse no epicentro do evento que este ano cumpriu a súa 54 edición e que demostrou que a fórmula desta festa, declarada de Interese Turístico de Galicia non está esgotada. Un dos seus principais motores é a degustación gastronómica e os dous grandes esforzos do Concello por popularizar a troita demostraron ser fórmulas de éxito: por unha banda, desde hai uns anos, as troitadas celébranse nos distintos lugares e parroquias durante as semanas anteriores á festa. Cada convocatoria recibe a ducias de veciños dos lugares, e, sen embargo, ningunha lle resta visitantes ao fin de semana grande da festa.
É dicir, que lonxe de saciar aos comensais, anímaos a degustar troita varias veces no mes da festa. O outro grande esforzo é o económico. As racións de troita frita e en escabeche seguen a custar tres euros acompañadas de viño ou auga e pan. O prezo leva sendo o mesmo desde hai anos e o traballo de ducias de voluntarios e voluntarias que elaboran o produto e realizan toda a tarefa loxística fai que o prato estrela poida manterse asequible mesmo no ano máis duro da inflacción.
A outra tarefa compartida e na que hai un gran esforzo do voluntariado é o concurso de pesca, que segue a atraer a ducias de participantes. A Sociedade de Caza e Pesca Verdeseixo coopera coa organización deste evento e un dos actos centrais do Día Grande é a entega de premios.
Este ano, Antonio Lorenzo, da sociedade de caza e pesca local, acadou primeiro posto da categoría senior. O segundo posto foi para Luis Esperón (Verdeseixo) e o terceiro para Manuel Alfonso Fontán, do mesmo clube. A troita máis grande acadouna Manuel Alfonso, tamén de Verdeseixo que capturou un exemplar de 33 centímetros. Na categoría de sociedades, o primeiro posto foi para a sociedade de saza e pesca local, o segundo para o Club Carballedo e o terceiro para o Club de Caza e Pesca Padrón. En veteranos todos os premios foron para o club Río Ulla: o primeiro post acadouno Manuel Mariño Varela, o segundo Raúl Mariño Teira e o terceiro Ramiro Rey. Na categoría feminina gañou Nieves Iglesias (ADN Ribadavia) e o segundo posto foi para Nieves Salgueiro (Verdeseixo).
Na categoría xuvenil triunfou Ángel Blanco Falcón, seguido de Fabián Eiras e de Iago Fraga . Na categoría infantil gañou Iván Moledo Amoedo e seguírono Martín Lorenzo e Ainara Estévez.
A festa rematou coa terceira xonada do festival de música folk, con Cantos na Taberna, Catroventos e Cantanascroas. No seu discurso, o alcalde lembrou aos alcaldes precedentes que impulsaron e mantiveron a festa: Eliseo Lopo, Jaime Vidal, Fidel Rodríguez e Perfecto Rodríguez e aos voluntarios que traballan nela. Díaz non esqueceu a defensa mediambiental do río, e alegou que Ponte Caldelas "amosou toda a súa solidariedade durante a pandemia e defendeu, defende e defenderá sempre o seu río Verdugo, un río sen o que non habería esta festa e sen o que este pobo e estas xentes non teríamos futuro", sentenciou.
