Lunes. 10.12.2018 |
El tiempo
Lunes. 10.12.2018
El tiempo

Galaxia reeditará 'Cancioneiro de Cotobade' en homenaxe a Antonio Fraguas

Unha das reunións do rexedor cos responsables da Editorial Galaxia. DP
Unha das reunións do rexedor cos responsables da Editorial Galaxia. DP

Jorge Cubela destacou que esta publicación "está moi vencellada ao noso concello e pode mesturarse coa música, o que lle outorga un valor engadido que nos permitirá chegar a moita máis xente"

O Concello de Cerdedo-Cotobade contará con programación propia en homenaxe a Antonio Fraguas durante o ano 2019, no que se lle adicará o Día das Letras Galegas.

O Concello vén de anunciar que a primeira iniciativa desta celebración será a reedición de Aportacións ó Cancioneiro de Cotobade, unha obra publicada en 1985 pola Fundación Otero Pedrayo.

Este traballo vai saír adiante da man da Editorial Galaxia, coa que o presidente municipal, Jorge Cubela, mantivo unha primeira reunión de traballo na súa sede de Vigo a finais de setembro.

Nesa xuntanza abordáronse os detalles iniciais desa reedición, que vén de concretarse e que vai incluír un disco con 13 temas musicalizados no que vai colaborar Sonsoles Martínez, veciña de Tenorio.

EMBLEMÁTICA. O presidente municipal, Jorge Cubela, explicou que esta publicación "é moi emblemática na bibliografía de Antonio Fraguas e ademais está moi vencellada ao noso concello e pode mesturarse coa música, o que lle outorga un valor engadido que nos permitirá chegar a moita máis xente a través da diversificación das distintas ramas culturais".

O "grande obxectivo" para o ano 2019 por parte do Goberno Local de Cotobade será a difusión da figura de Fraguas, segundo explicou Cubela, que adiantou que se está a traballar "nun amplo repertorio de actividades que estarán pensadas para aproximar a nosa cultura á xente".

Ademais, engadiu que a intención do Concello de Cerdedo-Cotobade pasa por "aproveitar todo o ano con actividades arredor de Fraguas e non limitarse ás datas máis próximas ao 17 de maio". "Queremos espremer o Ano Fraguas e imos comezar coas nosas actividades dende comezos de 2019", detallou.

"Cremos que as Letras Galegas axudan a construír a identidade e a cultura do noso país, algo co que estou plenamente comprometido, e debemos facelo entre todos e todos os días. Agora, a Cerdedo-Cotobade tócalle a responsabilidade e a honra de liderar este proceso e, xunto ao meu Goberno, vou deixar a pel para que toda Galicia se sinta orgullosa do galego e das nosas letras e para que todos os galegos coñezan moito máis unha figura indiscutida e indiscutible como a de Antonio Fraguas", concluiu o primeiro edil.

Galaxia reeditará 'Cancioneiro de Cotobade' en homenaxe a Antonio...
Comentarios