A Policía Local de Poio investiga a unha muller de 45 anos, veciña de Pontevedra, por un presunto delito de furto de produtos tecnolóxicos, que foron sustraídos no centro comercial A Barca, en Poio.
Os axentes foron requeridos o sábado, arredor das 10.30 horas, polos vixiantes de seguridade do mesmo centro comercial, e identificaron á pontevedresa, que empregaba unha bolsa para gardar os obxectos sustraídos. A presunta autora do furto, foi sorprendida cando saltara a alarma do arco de seguridade. No interior da bolsa, a Policía Local de Poio atopou dous reprodutores de música, uns cascos para escoitar música, unha máquina cortapelo e un reloxo despertador dixital. Segundo explicaron fontes da Policía Local, o método máis habitual que se adoita empregar neste tipo de furtos é a retirada da alarma, ou a utilización de calquera medio que impida que esta se accione.
Unha vez identificada pola Policía Local no mesmo lugar dos feitos, a investigada foi citada para un xuízo inmediato por un presunto delito leve de furto.
PENAS PARA ESTE DELITO. Segundo informaron dende a Policía Local de Poio, as penas para este tipo de delito pasan por impoñer unha multa de un a tres meses, sendo habitual no caso de furtos en establecementos a imposición de cinco euros diarios nun periodo de dous meses, sempre que o valor do sustraído non supere os 400 euros. A pesar disto, deberase atender á natureza dos feitos.
Nos supostos nos que resulte complicado poder facer fronte a unha multa por delito de furto en establecementos comerciais, se se carecen de medios económicos, deberase acreditar dita situación persoal por calquera medio válido, aos efectos de intentar reducir a multa por furto ou, no caso de que puidera ser solicitado e estimado, poderíase sustituir o abono de dita multa por traballos en beneficio da comunidade, unha pena que, en calquera caso, deberá ser analizada conforme a cada caso particular.
