A Policía Local de Poio investiga as causas dun atropelo que tivo lugar na noite do pasado luns na Avenida da Cruz, situada na parroquia de Combarro. Neste punto da PO-308, en torno ás 21.00 horas, un mozo de 19 anos, veciño de Campelo e residente na zona, foi golpeado por un turismo mentres cruzaba por un paso de peóns, un suceso do cal, polo momento, descoñécense as circunstancias exactas.
Como consecuencia do golpe, o mozo sufriu diferentes traumatismos e tivo que ser trasladado a un centro hospitalario de Pontevedra, onde foi ingresado.
Segundo informou a Policía Local, a persoa que conducía o vehículo, e que ía en dirección a Poio, foi sometida aos pertinentes test de alcol e drogas, dando negativo en ambos casos.