Desembarco de socialistas en Carballedo co gallo da presentación de Lina Garrido como candidata do PSdeG para alcaldesa do concello fusionado. Garrido elixiu o baixo do Concello, no salón multiusos para un evento de presentación no que non faltaron o secretario xeral provincial, David Regades, nin o autonómico, Gonzalo Caballero, así como a presidenta da Deputación Provincial, Carmela Silva.
Garrido contou además con destacados alcaldes, concelleiros históricos e persoas vinculadas ao partido socialista de toda a provincia para unha data na que, como corresponde ao anticipo da precampaña, se están facendo demostracións de apoio ás distintas formacións municipais. A voceira da oposición quixo agradecer o apoio dos seus compañeiros e compañeiras e destacou "o meu gusto pola política municipal, que todo o mundo neste concello coñece e que fai que, unha vez que me escolleu a executiva local, teña o obxectivo de entregarme ao cen por cen a esta causa".
A candidata suma oito anos como voceira socialista e xa foi tenente de alcalde na etapa do bipartito en Cotobade
ÚNICA MULLER. Lina Garrido, que foi tenente de alcalde na etapa anterior como nacionalista, e que suma xa oito anos de traballo nas filas do PSdeG, destacou que "será unha honra e un orgullo ser a única candidata muller que encabece unha lista en Cerdedo-Cotobade" e destacou a importancia que a súa formación "lle dá e lle dará á igualdade" nesta etapa.
A xa candidata, recibiu as loubanzas de David Regades e as felicitacións de Gonzalo Caballero, que a animaron a conseguir dar oa volta aos marcadores nas vindeiras eleccións de maio.
A candidata desvelou que quere contar cun equipo equilibrado, pero a lista dos socialistas non está, nin moito menos, pechada "posto que agora somos un concello fusionado, estamos nunha nova etapa e temos moi claro que a nosa representatividade ten que reflexar esa circunstancia, de xeito que estamos traballando con todas as parroquias de Cerdedo e Cotobade".