Callos quentes, música e moitas ganas de vivir o Nadal. Así transcorreu a xornada do domingo na Seca, onde a carpa instalada para a ocasión, e que se estreou esta fin de semana con obradoiros, actividades e a actuación da orquestra Marbella, cedeu o protagonismo aos máis pequenos da casa, para gozar do musical infantil que completou o calendario de actividades xa en funcionamento dende as 11.00 horas.
O evento, que contou cunha boa afluencia de público, compartiu espazo coa Papanoelada moteira a cargo do Motoclub A Rosa dos Ventos, que uns metros máis lonxe quentaba motores para partir dende a estatua homenaxe ao moteiro caído nunha ruta que percorreu o municipio, e que xa se converteu en tradición.
Durante o itinerario, os pinchos de callos e empanada, xunto aos sorteos dun casco entre os asistentes, cortesía de O Garaxe Custom, e dunha sesión de lavado e secado por parte da lavandería Blanca Madama Sanxenxo, engadiron un plus a unha xornada emotiva na que decenas de Papanoeles volveron conquistar o municipio a dúas rodas.
A chocolatada, cortesía da Reiboa, puxo o toque de ilusión ao remate.
