Ao procedemento aberto pola Administración local para a redacción e dirección da obra concorreron un total de once empresas. E é que se trata dunha ambiciosa actuación que suporá "un antes e un despois" no que a seguridade peonil, dotación de servizos e redución da pegada de carbono se refire. Os traballos financiaranse nun 80% a través dos fondos que obtivo o Concello, xestionados de xeito directo polo departamento municipal que dirixe Agís, do Instituto para a Diversificación e Aforro de Enerxía (Idae), dependente do Goberno central. En concreto, a contía obtida supera os 563.000 euros, polo que o 20% restante será asumido polo Concello. En total, investiranse máis de 800.000 euros na actuación.
O responsable de Urbanismo insistiu en que os detalles do proxecto serán presentados ante a veciñanza, "de xeito que poidan coñecer de primeira man os grandes beneficios que supón esta obra tan ambiciosa, que é moi necesaria para revitalizar un emprazamento chave desde o punto de vista turístico e social".
A obra incluirá a humanización e pavimentación, con materiais dunha calidade sostible, nunha lonxitude de preto de 300 metros, ademais da creación de dúas zonas exclusivas para peóns, unha na parte máis próxima á praia e outra ás vivendas e locais existentes na zona, o que redundará "nunha mellora da accesibilidade, facilitando o tránsito a pé e en bicicleta", ademais de dotar de servizos básicos a zona. Agís estima que os traballos serán unha realidade no verán de 2023.