A pesar da previsión de choiva, Ponte Caldelas non tivo que frear as súas actividades de verán, que durante este periodo están a dinamizar a vida do municipio cada semana, dende a seguridade e o respeto das medidas. Así, onte, a pesar de que o mal tempo non permitiu a actuación da banda de música, tal e como estaba previsto, a actividade non faltou no entorno da Alameda e da Praza de España, onde na sesión vermú a música de banda si estivo presente, a través de 40 altofalantes que o Concello instalou recentemente, co obxectivo de que o bo ambiente non decaia debido ao mal tempo.
Así, o alcalde, Andrés Díaz, anunciou que o Concello investiu este ano 18.000 euros nos altofalantes, que "nos permiten seguir dinamizando Ponte Caldelas os días que non podemos ter actuación debido á choiva". Pola noite o ambiente tampouco decaeu coa pinchada de música variada a través destes aparatos.
