Pontevedra é o lugar escollido polo colectivo A Rente do Chan-Pladever para poñer o foco sobre a súa loita máis prolongada no tempo e a que tivo un resultado máis sorprendente: o proceso para lograr a caducidade do encoro de Ponte do Inferno, no río Verdugo e demoler o mesmo.
A asociación promoverá a proxección o vindeiro sábado no auditorio do Pazo da Cultura ás 18.00 horas do traballo audiovisual DamBusters, realizado por Franco Campos-López, co que se explora a historia recente das presas esquecidas en distintos ríos europeos e do proceso desenvolto polos colectivos para removelas.
A película fai unha parada especial en Ponte Inferno, no río Verdugo, por ser este un caso chamativo, ao ter máis de cen anos de vida a explotación e ao ignorar a
empresa concesionaria as reiteradas oportunidades de adaptar as condicións do salto para que cumprira coa normativa actual. Os testemuños de membros de A Rente do Chan van combinándose con outros como os dos e as mariscadoras da ría de Vigo nun filme que a asociación considera que pode ser moi útil para explicar parte da loita que os e as ecoloxistas teñen para defender os ecosistemas fluviais.
Sobre as 19.00 horas, unha vez acabada a proxección, iniciarase un coloquio no que participarán algúns dos integrantes deste colectivo. A caducidade da presa de Ponte Inferno declarouse oficialmente o 30 de xuño deste ano.
A Xunta recomenda demoler o embalse, algo inédito no territorio galego ata a data. A empresa deixou de turbinar a auga en 2021, pero o expediente de caducidade iniciouno A Rente do Chan no ano 2018.
