Neste contexto, o Fondo de Emerxencia Social prestou axuda a un total de 363 familias, cun investimento que superou os 65.000 euros anuais, e que supón o dobre do que figuraba inicialmente no Orzamento do pasado exercicio. Así, a edil de Benestar e Mocidade, Rosa Fernández, valorou que "a pandemia deixou a moita xente nunha situación económica moi precaria, de aí que apostásemos por ir aumentando o fondo de xeito periódico". A través desta acción sufragáronse custes de primeira necesidade para veciños e veciñas que non dispoñen de recursos para facer fronte a compras de produtos de primeira necesidade, alimentos, facturas de consumo eléctrico ou alugamentos, segundo indicou a concelleira.
Outro dos servizos que xogaron un importante papel no pasado ano foi o de Axuda no Fogar (SAF), do que se benefician máis de 50 familias en Poio. Neste eido, o investimento para levar a cabo a prestación supera os 400.000 euros, dos que o Concello achega máis de 83.000 das arcas municipais, que se suman á subvención de 323.000 euros da Xunta de Galicia. Ademais, o departamento poiense investiu preto de 4.000 euros noutro tipo de recursos, tamén para as familias máis necesitadas. "Continuaremos traballando para que ningún veciño ou veciña que acredite atoparse nunha situación de risco económico ou exclusión quede desamparado", asegurou Fernández, que tamén lembra que dende a Casa Rosa desenvólvense outras iniciativas pensadas para servir á cidadanía, como o asesoramento a 200 familias na revisión das Pensións Non Contributivas. Ademais, atópanse en funcionamento programas como Saudemente, que se adaptou á pandemia con reparto de material a domicilio, e Ata máis ver, a través do que se contacta de xeito periódico coas persoas maiores que viven soas.
Para este ano 2021, o investimento destinado a Servizos Sociais superará o 1,2 millóns de euros, tal e como figura no Orzamento municipal aprobado inicialmente en xaneiro. O Fondo de Emerxencia experimentou un forte crecemento ata os 50.000 euros, e "aumentarase se é preciso".
