Os socialistas de Barro celebraron este mércores na Praza do Viño o acto político que deu paso á súa VII Xuntanza, na que se reuniron para unha comida de confraternización nun restaurante do municipio, á que acudiron ducias de afiliados e simpatizantes.
Nesta convocatoria, o equipo de José Sanmartín quixo celebrar os seus tres anos como membros do Goberno coaligado do Concello, no que se desterrou a un equipo do PP liderado por José Antonio Landín, que levaba tres décadas á frente do Concello. Tal vez por esa circunstancia, os socialistas contaron nesta cita coa presenza do secretario xeral autonómico, Gonzalo Caballero, que acudiu ao encontro ao rematar o acto oficial do PSdeG en Rianxo, con motivo do Día da Galicia.
Ademais, José Sanmartín contou coa presenza da recén nomeada subdelegada do Goberno, Maica Larriba; do alcalde de Cuntis, Manuel Campos Velay e coa responsable do PSdeG de Campo Lameiro, Paz Vidal, entre outros.