A Xunta de Galicia aclarou este xoves que o peche dunha zona do porto de Combarro na que estacionaban vehículos no verán non poderá cambiarse. Esta obra, indican a Consellería de Infraestruturas e a do Mar "responde á necesidade de realizar as obras do novo emisario submarino da Edar de Os Praceres, no que a Xunta inviste doce millóns de euros e que dará servizo a máis de 140.000 habitantes da ría de Pontevedra, incluído Poio", algo que fai que se optara por priorizar este obxectivo.
Así, tal e como recorda o ente autonómico, "o saneamento das augas é unha actuación de vital importancia para o conxunto da cidadanía, dos profesionais e do coidado medioambiental da ría".
Con respecto á petición de que se exploren outras alternativas, ambas consellerías insisten en que se trata "dunha obra extremadamente complexa porque non só consiste en acopiar materiais, senón tamén en lanzar o emisario. Para a execución desta infraestrutura é necesario apoiarse nunha instalación portuaria e dispoñer do terreo para poder desenvolver as distintas manobras e poder mover pezas de grandes dimensións e fundamentais para a colocación do emisario".
Así, engaden que "estas operacións deben realizarse nas mellores condicións meteorolóxicas" e, ante ese requisito, "os técnicos de Augas de Galicia determinaron que tanto o porto de Combarro como o período estival son as opcións para executar os traballos con maior seguridade. Nesta época adoita haber condicións meteorolóxicas máis favorables".
De feito, aclaran que na instalación da infraestrutura é preciso contar con boas condicións de estabilidade e flotabilidade evitando que as ondadas afecten ás manobras, requisitos que cumpre o porto de Combarro. "Trátase de evitar episodios de ondadas extremas e facilitar que as operacións marítimas se desenvolven coa maior seguridade para as embarcacións e o persoal técnico, ademais de buscar a menor afectación ao tráfico portuario, que é reducido na contorna do dique da Canteira".
A Xunta lamenta as molestias que este peche do peirao da Canteira poida ocasionar e apela "á comprensión de todas as partes pois trátase dunha actuación que se realiza en beneficio do conxunto da cidadanía da ría e seguindo rigorosos criterios técnicos", e insta, do mesmo xeito, a que se exploren alternativas para o problema de aparcamento.
