A Xunta, a través de Augas de Galicia, levou a cabo onte tarefas para eliminar un punto de verquido que afectaba ao rego Barranco dos Muíños, no tramo que discorre polo lugar de A Devesa, na parroquia de Arcade.
Segundo apuntan fontes autonómicas, o foco foi localizado por parte do persoal do Plan de Control de Verquidos, dependente da Administración galega, durante os labores rutineiros de inspección efectuados no ámbito territorial deste concello.
Na inspección, os responsables observaron un verquido en condicións inadecuadas, procedente da rede de saneamento municipal que discorre pola rúa Sucadiña Sameán, que orixinaba unha afección visual na superficie da auga. Deste xeito, procedeuse a notificar a incidencia ao Concello de Soutomaior para que levase a cabo as oportunas accións correctoras.
Posteriormente, nunha nova inspección xirada á zona tras informar o Concello da subsanación da incidencia na rede de saneamento, comprobouse o cese das achegas contaminantes cara ao dominio público hidráulico.
