Xogos populares, baseados na tradición, no humor e nas tarefas do campo que sempre se realizaron nas vilas galegas. Esa é a raíz das competicións que se desenvolverán esta fin de semana en dous puntos de Ponte Caldelas: Xustáns e A Insua, e que colmarán o programa cultural de ambas parroquias.
Así a parroquia de San Martiño de Xustáns reforza a súa programación das festas de verán, adicadas á Virxe do Carme, coa segunda edición das Agrolimpiadas, mentras que A Insua retoma a súa afección pola malla, unha disciplina que consiste no lanzamento de discos para derrubar espetos.
A celebración máis próxima será a de Xustáns, onde este venres a partir das 18.30 horas, se iniciarán as Agrolimpiadas cunha proba de Lanzamento de sacho. O programa inclúe tamén especialidades como encestar espigas nun capacho, encher botellas de auga con vasos furados, unha ximkana con sacos de espigas, carreiras de carretas e mesmo un concurso de orixinalidade nos cantos para escorrentalos paxaros. Para os máis frikis do mundo rural, a organización deseñou un test agrícola para poñer a proba os coñecementos dos participantes. A inscrición realizarase antes das probas e é completamente gratuíta.
Ás 21.30 horas, rematada a competición, actuará o mago Javier Muro.
Xustáns celebra así a segunda edición dun evento cun único precedente en 2013, ano en que tivo unha gran aceptación.
Pola súa parte, a Asociación de Veciños da Insua en colaboración coa comunidade de montes, ten xa todo preparado para unha nova edición do Campionato de Malla. Neste caso, a convocatoria vén celebrándose dende a década dos 90, pero que deixou de realizarse hai seis anos. A cita para recuperar esta competición será o sábado a partir das 17.00 horas na Carreira Ancha. Para participar só hai que presentarse e inscribirse por parellas.
A disciplina da malla está moi presente en lugares como A Insua, Chaín, Silvoso, Forzáns, Anceu e Caritel. Lugares que teñen en común a relación migratoria con Portugal. Ao ser unha competición coñecida, a organización mesmo conta con recibir a competidores de municipios veciños, como Fornelos de Montes.