Axentes da Garda Civil detiveron un veciño de Gondomar, de 32 anos, como presunto autor do roubo dun lote de ferramentas dunha obra na que estivera traballando e da que fora despedido recentemente. Segundo informaron fontes do instituto armado, a investigación iniciouse cando un contratista denunciou a desaparición de varias ferramentas que estaban nunha caseta dunha obra en Baiona.
Así, o construtor denunciou a falta dunha máquina de azulexar, un martelo percutor, un atornillador de batería e varios cubos de pintura de 15 litros. Dado que a fechadura da caseta non estaba forzada, a Garda Civil centrou as pescudas na contorna laboral da obra, e así chegou ao sospeitoso, que resultou ser un traballador que fora despedido recentemente da empresa de construción.
Cando os axentes localizaron o home, este relatou que non subtraera as ferramentas, senón que as escondeu na propia obra para vingarse do empresario polo diñeiro que lle debía. Con todo, a Garda Civil puido comprobar que o sospeitoso levara as ferramentas á súa casa e que, ao saber que estaba sendo investigado, as devolvera para simular que estaban ocultas na obra desde o principio.
Unha vez localizados e recuperados os efectos subtraídos, o home foi detido como presunto autor do roubo. Este veciño de Gondomar foi posto en liberdade após a instrución de dilixencias, á espera de presentarse cando sexa requirido ante a autoridade xudicial en Vigo.