A presidenta da Deputación de Pontevedra, Carmela Silva, confirmou este mércores que tanto ela como todas as deputadas do PSdeG-PSOE e o BNG, integrantes do actual goberno provincial, secundarán a folga feminista convocada para o 8 de marzo, Día Internacional da Muller.
"Queremos que a sociedade sexa consciente de que se nós paramos se para o mundo", explicou Silva en referencia ao papel das mulleres nesta folga, que debe contribuír a construír unha sociedade "mellor e máis xusta" onde "todos e todas sexamos iguais".
A axenda da presidenta non terá contido, avanzou a titular da Deputación de Pontevedra, que acudirá aos actos e concentracións que se celebrarán nas cidades de Pontevedra e Vigo.
Tanto Carmela Silva como as deputadas do PSdeG-PSOE e o BNG solicitaron formalmente que se lles desconte o salario correspondente á xornada de folga.
Ademais, a presidenta fixo un chamamento para que todas as traballadoras da institución provincial se sumen a este paro internacional de mulleres para "reclamar todas xuntas que o mundo non funciona sen nós".
O goberno provincial promove unha concentración diante da súa sede institucional, ás doce da mañá, que servirá como "colofón" á ampla programación que se impulsou desde a Deputación de Pontevedra para conmemorar este día.
A programación incluíu, entre outros actos, un encontro de mulleres xornalistas en Pontevedra, unha acción artística dentro do programa Violencia Zero en Ponteareas ou a inauguración, este mércores en Pontevedra, da exposición 'Rompe. Xoga en Igualdade' que se poderá visitar ata o 8 de abril.
O Concello de Pontevedra tamén informou que tanto a alcaldesa en funcións, Carme da Silva, como as outras catro edís do goberno municipal do BNG sumaranse tamén á folga do 8- M e liberaron as súas axendas oficiais para participar nos actos e concentracións que se organizarán na cidade.
