Os viveiros de empresas de Barro e Lalín da Deputación de Pontevedra e a Fundación Incyde celebrarán o 21 de abril ás 18,30 horas un webinario sobre as oportunidades de negocio que ofrecen as contornas rurais e que poderá seguirse por streaming.
As persoas interesadas xa poden anotarse para asistir mediante un formulario electrónico
Nun comunicado, a institución provincial explicou que o obxectivo é "analizar as oportunidades de negocio que pode ofrecer o rural, non só con actividades tradicionais, senón tamén coas derivadas das novas necesidades e demandas relacionadas coa sustentabilidade, a calidade de vida e a repoboación".
A charla, dirixida a viveristas, empresas, profesionais, persoas emprendedoras e público interesado, "profundará nos cambios producidos nos hábitos de consumo e nos ámbitos social e económico e en coñecer como poden aproveitarse para poñer en marcha novas iniciativas empresariais".
Concretamente, o webinario, moderado pola consultora empresarial e directora de proxectos de creación da Fundación Incyde, Maribel Pérez, abordará posibles nichos de mercado e as oportunidades que estes cambios crean no territorio: economía sostible, dixitalización, Obxectivos de Desenvolvemento Sostible (ODS), saber tradicional, produto local, igualdade de oportunidades, e asentamento de poboación feminina e mocidade, entre outros. Os asistentes verán ademais como aplicar unha análise Dafo e coñecerán estratexias para levar a cabo modelos de negocio.
As persoas interesadas xa poden anotarse para asistir mediante un formulario electrónico dispoñible na páxina web da Deputación.