A secretaria xeral de Emprego, Covadonga Toca, e o director do Igape, Juan Cividanes, mantiveron este xoves en Santiago unha xuntanza co presidente e responsables do comité intercentros de Maderas Iglesias para coñecer de primeira man a situación xerada e as demandas dos empregados.
Os representantes do Goberno galego trasladáronlle aos traballadores da empresa pontevedresa o apoio da Administración autonómica poñendo a súa disposición a mediación a través do Consello Galego de Relacións Laborais co obxectivo de que as negociacións avancen, agardando unha solución o antes posible.
A secretaria xeral de Emprego e o director do Igape apelaron, polo tanto, ao diálogo indicando que a Xunta sempre defende este camiño co propósito de buscar a mellor saída para os traballadores de Maderas Iglesias.
Toca e Cividanes tamén insistiron nese compromiso do Goberno galego de seguir mantendo un diálogo permanente tanto cos traballadores como coa empresa.
