O espazo público: un dereito fundamental dos cidadáns
O I Certame de Fotografía sobre o espazo público da Deputación de Pontevedra, #FotoÁgora, repartiu 32 galardóns entre 17 dos participantes por un importe total de 40.000 euros ► O evento busca difundir de maneira gráfica e amena a filosofía e os dez principios da Rede Ágora
Formada pola Deputación de Pontevedra e 54 concellos da provincia, a Rede Ágora é unha iniciativa de acción institucional que pretende valorizar o espazo público como un dereito fundamental da cidadanía. O seu obxectivo é que os municipios logren un incremento substancial do espazo reservado ás persoas, aumentando tamén os itinerarios peonís e ciclabes.
O proxecto apoiase en dez principios básicos: O espazo público é un dereito. As persoas primeiro. Mobilidade inclusiva. Autonomía infantil. Mobilidades alternativas. Espazos seguros. Hábitat saudable. Espazos amables e de calidade. Actividade económica de proximidade. Mobilidade sustentable.
Un decálogo que prioriza as necesidades dos sectores máis vulnerables e marca a xerarquía a seguir: 1º a persoa ou o peón, 2º o ciclista, 3º o transporte público e 4º o vehículo privado. Tamén busca o calmado de tráfico con medidas de redución da velocidade, entre outras, e alcanzar un equilibrio que respecte o medio ambiente. As persoas con discapacidade e os nenos son unha prioridade, facilitando a súa mobilidade sen barreiras e con total seguridade. Outros beneficios dunha boa planificación co espazo público poden afectar en cuestións de gran importancia como a saúde (exercicio, menos contaminación e ruídos) e á economía, principalmente no comercio local o de proximidade.
O Certame de Fotografía sobre o espazo público #FotoÁgora, que esta semana entregou 32 galardóns a 17 participantes cun importe económico de 40.000 euros, a través do departamento de Mobilidade Alternativa e Espazo Público da Deputación de Pontevedra, premia imaxes simbólicas e de gran forza que amosan que as persoas deben ser as 'propietarias' ou principais destinatarias do espazo público para mellorar a súa calidade de vida.