"A situación é preocupante", comentou este luns o coordinador dos concursos "Ben veñas, maio", o mestre do IES A Xunqueira II Jorge Potel. "A miña experiencia dime que os mozos teñen serias dificultades para empregar o galego. O seu uso é pobre e o problema arrástrase dende Infantil e Primaria. Non existe para nada unha suposta situación de equilibrio, como se di. Os rapaces teñen serias dificultades para falar e escribir en galego". Advertindo sobre esta situación, quedaron convocados o luns os sete certames que agrupa o "Ben veñas, maio", unha iniciativa do Concello e da Coordinadora de Equipos de Normalización Lingüística dos institutos públicos de Pontevedra, que cumpre 25 anos.
"Por iso, desgrazadamente, é necesario seguir convocando estes concursos. Hai que tratar de dinamizar o uso do idioma tanto ou máis que nunca", explicaba Potel. "Porque non estamos a falar dunha segunda lingua estranxeira. Debemos darlle aos rapaces ferramentas para demostrarlles que se pode vivir ao 100% en galego, para que se manexen con normalidade con el".
O concelleiro de Normalización Lingüística, Alberto Oubiña, que acompañou este luns a Potel na presentación da iniciativa, coincidiu co mestre á hora de resaltar os obxectivos de "Ben veñas, maio", "que naceu hai 25 anos con dous concursos e non deixou de medrar". Segundo dixo, "o noso traballo pasa por axudar a que os mozos lle perdan o medo".