O Xacobeo prolongará un día máis as Festas da Peregrina de Pontevedra cun concerto de Víctor Manuel. Será o luns 22 de agosto, na Praza de España, con entrada de balde. Anunciouno este martes a concelleira de Festas, Carme da Silva, cando informou sobre o que restaba por saberse da semana de festexos, fundamentalmente, as actuacións de Los Planetas, grupo referente do indie estatal, o sábado 13 de agosto e da banda de rock Ilegales, que lidera Jorge Martínez, o sábado 20 de agosto.
Da Silva lembrou que, tras a cancelación do concerto de Enrique Bunbury, o Concello mantiña contactos co Xacobeo para tratar de substituír ese espectáculo en Pontevedra. Finalmente, a Xunta traerá a Víctor Manuel. "Isto contribuirá a darlle continuidade á semana das festas cun día máis de concertos", sinalou a concelleira.
Deste xeito e tendo en conta os artistas xa coñecidos, a programación da Peregrina abrirase con Los Planetas o 13 de agosto. Nos días seguintes virán Zahara (14), Coque Malla (15), Fernandocosta (16), Treixadura (17), "que ofrecerá un concerto moi especial con convidados como o Coro Cantigas e Agarimos, Rodrigo Romaní e a Banda de Música de Pontevedra", o espectáculo familiar O pequeno rei da sabana (18), Juancho Marqués (19), Ilegales (20) e Camela (21). O epílogo dos festexos correrá a cargo de Víctor Manuel (22). Todas estas actuacións terán lugar na Praza de España, ás 22.30 horas, con entrada libre.
Carme da Silva tamén desvelou que concertos se celebrarán na Praza da Ferrería. Abriraos Galifunk Brass (13 de agosto). Seguiranlle o festival de corais da cidade (14), Rock Circk (15), Coro Encaixe (16), Marcelo Dobode (17), Conductores Suicidas (19), Black Stones (20) e Laroá (21). Estes serán ás 21.00 horas.
O 18 de agosto, que non hai concerto na Ferrería, é o día no que volverá á rúa o desfile da Batalla de Flores. O seu percorrido é unha das novidades das festas que desvelou a concelleira. Partirá da rúa Virxinia Pereira e percorrerá todo Loureiro Crespo, ata seguir coa ruta habitual polo centro e rematar na rúa Padre Amoedo.
Da Silva tamén anunciou que as atraccións volverán ocupar a Alameda e que a programación infantil se traslada á Praza da Curtidoira, no barrio do Gorgullón. Desta maneira, segundo a concelleira, contribúese á diversificación de espazos nas festas "e colaboramos co sector hosteleiro ao non obrigar a levantar as terrazas da Praza do Teucro, que era onde se viñan celebrando estas actividades antes da pandemia".
Finalmente, as Festas da Peregrina recuperan tamén as tiradas habituais de fogos, pero con variacións. Celebraranse o sábado 13, o luns 15 (véspera de San Roque) e o domingo 21 de agosto. "Todas se van ter que facer entre a Ponte do Burgo e a Ponte de Santiago, o mesmo espazo que habitualmente se usa para a tirada dos das festas de Santiaguiño". A concelleira explicou que a decisión non fora tomada neste caso polo Concello senón pola Autoridade Portuaria, que cambiara recentemente a súa normativa e que agora non autorizaba tiradas nos espazos que dependían dela directamente, como o das Corvaceiras.
