Contos pola rúa acompañados de jazz. Contos en todos os hospitais da área sanitaria. E contos no antigo convento de Santa Clara. Pontevedra conmemorou este luns ao grande o Día Mundial da Narración Oral cunha programación de actividades que se prolongou durante toda a xornada e que encheu de historias distintos espazos da cidade.
No caso da capital da provincia, o Concello e o festival Sete Falares son os promoven esta celebración, "que comezou nos anos 90 en Suecia e que posteriormente se estendeu por todo o mundo", lembrou durante a presentación da actividade a concelleira de Festas, Carme da Silva. "O obxectivo é reivindicar a arte da narración oral que en Galicia en xeral, e en Pontevedra en particular, conta cunha tradición moi importante". En Galicia son exactamente catro os colectivos que promoven esta conmemoración do 20 de marzo: os festivais Atlántica (interterritorial), Falando a boca chea (A Coruña), Sete Falares (Pontevedra) e a asociación Noga (Narración Oral Galega).
Pavís Pavós, que é o grupo de contacontos que está detrás de Sete Falares, foi precisamente protagonista dunha das propostas centrais da conmemoración, a que tivo lugar pola tarde entre a Praza de España e a Praza da Peregrina. Xunto a Polo Correo do Vento e Bea Campos contaron contos acompañados pola Street Band, unha agrupación de jazz.
Despois diso, no antigo convento de Santa Clara, o contador de Lalín Celso Fernández Sanmartín protagonizou un espectáculo de narración oral.
O outro espazo no que onte se contaron contos foron os tres hospitais da área sanitaria. Esa proposta, dirixida tanto a público infantil como a público adulto, desenvolveuse fundamentalmente pola mañá. Bea Campos actuou no Hospital de Montecelo. Raquel Queizás, Carmen Domecq, Soledad Felloza e Quico Cadaval fixérono no Hospital Provincial. E, finalmente, Olga Abad estivo no Hospital do Salnés.
O contador retirado José Campanari foi o autor do manifesto galego deste ano polo Día Mundial da Narración Oral. "Fixo unha reflexión moi linda", avanzou Tareixa Alonso, de Pavís Pavós, na presentación da festa. Nel pódese ler: "O misterio que gardan as historias segue voando polos aires".