"Nunca máis ao terror, o odio e o fanatismo fascista"

"A causa do 12 de novembro, é a causa da xustiza, da verdade e da reparación aínda pendentes para todas as vítimas e as súas familias". O alcalde de Pontevedra, Miguel Anxo Fernández Lores, expresou así a necesidade de actos de lembranza das vítimas do fascismo no discurso que ofreceu este luns durante o acto de homenaxe aos fusilados o 12 de novembro de 1936 na Caeira.

O acto do luns é unha maneira de lembrar publicamente a crueza do fascismo e o Concello de Pontevedra leva realizándoo dende 1999. As familias foron as protagonistas do encontro. "Con eles honramos as súas familias perseguidas, as mulleres que quedaron para lembrar e para loitar contra a exclusión, contra o medo e contra o esquecemento". Na rúa 12 de Novembro había tamén representantes públicos como a subdelegada do Goberno, Maica Larriba, e representantes do BNG, PSOE e PP.

Durante o acto houbo mención especial para Gonzalo Adrio, falecido a principios de ano. A el referiuse o concelleiro Luís Bará como unha persoa chea de "amor e lealdade" que sempre estivo presente no acto dende que comezou a celebrarse. No encontro falaron tamén algunhas das familias a quen Adrio axudou como avogado para tramitar pensións á viúdas de asasinados polo fascismo, así como a súa filla. Ademais, Adrio era irmán e sobriño de dous dos fusilados aos que este luns se lle rendía homenaxe (José e Germán Adrio) e foi un dos impulsores da celebración deste acto por parte da Corporación Municipal de Pontevedra.

OUTRAS VÍTIMAS. Do mesmo xeito, o alcalde de Pontevedra quixo estender a homenaxe do luns a todas as vítimas do franquismo e recordou algunhas das tarefas que quedan aínda pendentes con respecto á reparación da memoria dos represaliados. Deste xeito, esixiu a existencia dunha "lei da memoria histórica na que a prudencia non impida facer xustiza", así como a anulación das sentenzas inxustas e dos informes infames cos que as autoridades falanxistas acusaron aos represaliados.

Do mesmo xeito, fixo referencia aos bens e títulos que aínda posúen os descendentes do ditador. "Hai que acabar co franquismo que está enterrado baixo a Cruz en Cuelgamuros e tamén co que segue vivo en Meirás, nos títulos nobiliarios e en fundacións que fan apoloxía do xenocidio e glorifican o ditador", rematou Fernández Lores.