Rematadas as festas de verán en Pontevedra, a capital da provincia (e as localidades do seu arredor) encaran setembro dándolle continuidade a festivais de música e recuperando programacións audiovisuais e expositivas.
No ámbito musical quedan pendentes de celebración o festival Revenidas, en Vilaxoán, entre o 7 e o 10 de setembro. O cartel de catro días está composto por máis de 30 grupos e artistas entre os que están Fillas de Cassandra, Los Chikos del Maíz, Ska-P, Rodrigo Cuevas, Heredeiros da Crus, Lamatumbá, Familia Caamagno e The Rapants. Destaca o concerto especial de XX aniversario que ten previsto dar alí Dakidarría.
O outro festival que queda pendente preto de Pontevedra é o Canteira Fest de Paredes, Vilaboa, que terá lugar os días 15 e 16 de setembro. Organizado pola Asemblea de Mocidade de Vilaboa, este ano contará coa presenza de Sés, MJ Pérez, Fillas de Cassandra, Terbutalina e Mondra, entre outros.
No ámbito musical destaca tamén o concerto que ten previsto ofrecer en Pontevedra a cantautora coruñesa Silvia Penide dentro da xira coa que está conmemorando 20 anos enriba dos escenarios. Será o 23 de setembro no Principal.
Un día antes ca ela actuará na capital da provincia o monologuista Luis Piedrahita, que desta vez se encarga do espectáculo que organiza anualmente a Asociación de Familiares de Enfermos de Alzheimer e outras Demencias de Pontevedra (Afapo). Estará no Auditorio de Afundación.
Audiovisual
Especial relevancia cobra a programación audiovisual este mes. Á parte do ciclo de cine euroárabe Amal en ruta, que se celebra esta semana no Teatro Principal, o cineclub da cidade tamén vén de anunciar que, tras o parón do verán, recupera as súas sesións habituais.
Setembro é ademais o mes no que teñen lugar as proxeccións dun dos festivais de cine máis importantes da provincia, o FIC Bueu, que inclúe, á parte das sesións de curtametraxes, coloquios con cineastas, actividades formativas, propostas para os máis novos e música.
Finalmente, este mes recupérase a actividade expositiva. Entre outras cousas, o Café Moderno prepara a instalación da mostra Picasso protagonista.
Do Pelete ao San Migheleiro
A programación cultural continúa en setembro igual que tamén continúa a programación de festas e verbenas. Entre outras, en setembro teñen lugar as do Pelete, Milagres de Amil, das Dores en Lalín e o San Migheleiro.
Entre o 7 e o 9 de setembro celébrase en O Covelo (A Lama) a Festa do Viño do Pelete, que se abre coa beizón das pipas do viño e se pecha coa La Oca Band e Tania Veiras.
O domingo 10 de setembro ten lugar a romería dos Milagres de Amil, en Moraña, unha das que máis devotos relixiosos congrega na provincia.
América de Vigo, Cinema, o Combo Dominicano, París de Noia e Panorama, ademais dos Satélites e as Broken Peach, entre outros, compoñen o cartel das Festas das Dores de Lalín, que se celebran entre o 22 e o 26 de setembro na capital do Deza. Tamén está prevista unha actuación especial da Banda de Lalín xunto a Serafín Zubiri.
Finalmente, a finais de mes é cando se celebra San Miguel en Marín. O acto institucional do patrón e a Danza de Espadas será o 1 de outubro. A festa popular pola rúa de San Migheleiro celébrase o día anterior (30 de setembro).
Calendario
Setembro, cineclub
O Cineclub Pontevedra recuperará a súa programación este mes con proxeccións de Kiarostami, Panahi, Mungiu e Pálmason. Luns e martes. Ás 20.30 horas, no Teatro Principal.
4-8 de setembro, Amal en ruta
Dende o pasado martes e ata o venres 8 de setembro proxectaranse, no Teatro Principal de Pontevedra, películas e documentais do ciclo Amal en ruta. Cada día ás 21.00 horas. Entrada libre.
7-10 de setembro, Revenidas
Entre o 7 e o 10 de setembro celebrarase en Vilaxoán o festival Revenidas (revenidas.com). O cartel (Fillas de Cassandra, Ska-P, The Rapants...) inclúe o concerto de XX aniversario de Dakidarría.
9-23 de setembro, FIC Bueu
O Festival Internacional de Curtametraxes de Bueu (FIC Bueu) terá lugar entre o 9 e o 23 de setembro. Pódese consultar a programación na páxina www.ficbueu.com.
15-16 de setembro, Canteira Fest
Os días 15 e 16 de setembro celebrarase o Canteira Fest en Paredes, Vilaboa. Terbutalina (na foto), Sés, Fillas de Cassandra e Mondra forman parte do cartel. Entradas: www.woutick.es.
22 de setembro, Luis Piedrahita
O monologuista Luis Piedrahita será o protagonista do espectáculo humorístico que organiza anualmente Afapo para recadar fondos. Actuará en Afundación. Entradas: ataquilla.com.
23 de setembro, Silvia Penide
A xira do XX aniversario de traxectoria da cantautora coruñesa Silvia Penide pasará por Pontevedra o 23 de setembro. Actuará ás 20.30 horas no Teatro Principal. As entradas están á venda en ataquilla.com.
27 de setembro, Picasso protagonista
Un dos proxectos expositivos máis destacados da nova temporada en Pontevedra será Picasso protagonista. Viñetas no cómic español contemporáneo que se inaugurará o 27 de setembro no Café Moderno. Entrada libre.
