O realizador de Meaño Eloy Domínguez Serén, a produtora de Marín Trece Amarillo, a produtora de Pontevedra Matriuska e o montador Juan Galiñanes de Cambados son algúns dos finalistas dos XXI Premios Mestre Mateo, que entrega a Academia Galega do Audiovisual (AGA) o 11 de marzo no Auditorio Municipal de Ourense.
Eloy Domínguez Serén é candidato na categoría de Curtametraxe, por Rompente, o traballo polo que xa fora premiado no Festival de Cine de Málaga. Producido por Kraken Films, compite con A entrevista, dirixida por Fernando Tato e Susana Sampedro; A rabia, de Alberto Díaz, e La entrega, de Pedro Díaz (esta última tamén finalista dos Premios Goya). La entrega conta ademais no seu equipo de produción coa pontevedresa Marta Fariña.
Trece Amarillo aspira a facerse co premio ao mellor videoclip por Pano corado, de Tanxugueiras. Na mesma categoría están A quincena do Apóstol, de Boyanka Kostova; Cobiza, de A Banda da Loba; e Noa, de Guadi Galego.
No caso da produtora de Daniel Froiz, Matriuska, é finalista na categoría de documental por A foreign song, de César Souto. Este título competirá con María Casares. A muller que viviu mil vidas, No somos nada e Onde máis doe.
Finalmente, polo que atinxe a Pontevedra, é finalista o cambadés Juan Galiñanes, que foi o montador de Live is life, de Dani de la Torre. Enfróntase aos responsables da montaxe dos dous títulos favoritos dos premios deste ano, Rapa e O corpo aberto. Xunto a eles están tamén os montadores de Unicorn Wars.
Por último tamén é candidata a viguesa María Vázquez por súa interpretación en O corpo aberto. Compite cunha compañeira de reparto da mesma película, Victoria Guerra e con dúas de Rapa, Lucía Veiga e Mónica López.
Así as cousas, a serie Rapa, dos imáns Jorge e Pepe Coira, e a película O corpo aberto, dirixida por Ángeles Huerta e protagonizada por Tamar Novas, con 19 e 16 candidaturas respectivamente, son as grandes favoritas dos XXI Premios Mestre Mateo, que foron presentados este martes na Coruña.
