Saíu o sol finalmente na terceira e última xornada do festival Surfing the Lérez e iso derivou nunha presenza masiva de público dende o mediodía ata a madrugada. Día grande do Surfing the Lérez, o deste sábado. Día para a historia do festival.
"A verdade é que sabe a gloria facer isto despois de dous anos e obter esta resposta do público", recoñecía a modo de balance final o coordinador do festival da Illa do Covo, Marcos Rivas. "Porque se alguén o pasou mal durante este tempo foi a xente da música e da hostalaría. Poder volver traballar así é unha alegría".
Moita xente de idades moi diferentes tomou o evento. "E notouse moitísimo. Volveron os picnics, volveron as familias e volveu o que é a esencia deste festival. A verdade é que estamos moi contentos porque este último día está indo fenomenal. A xente está entregada en todos os concertos. E a verdade é que non se pode pedir máis".
O festival foi medrando ao longo do día ata estoupar pola tarde. Cando Grande Amore, o que xa se prevía que sería un dos pratos fortes da edición deste ano, saltou ao escenario, milleiros de persoas ateigaban o espazo no que ía actuar. Foi o punto álxido do Surfing the Lérez 2022. Por momentos mesmo se facía complicado o acceso a través da pasarela de madeira que conectaba ese escenario pegado ao campus universitario co resto da Illa do Covo. O propio artista recoñeceu que nunca actuara ante tanta xente. E con el desatouse a loucura. Acabou tirándose ao público. Outro concerto ateigado e que funcionou como trallazo final do festival foi o de Terbutalina. Os de Muros pecharon a edición deste ano cunha actuación adrenalínica das súas que os confirmou como unha das bandas galegas cun dos directos máis poderosos e contundentes da actualidade.
A terceira xornada do festival xa volvera empezar forte (como fixera o día anterior cos Heredeiros da Crus), levando ao horario da sesión vermú dous dos grandes concertos do día: o de Boyanka Kostova e o de Familia Caamagno. O primeiro, por enriba, contou cun momento estrela: unha petición de matrimonio en vivo enriba do escenario. E incluíu unha chiscadela ao que foi un dos grandes concertos do venres, o de Dismal, que elixiu o festival pontevedrés para volver subir a un escenario despois de 15 anos. Chicho González levou unha das súas camisolas.
Os Boyanka Kostova fixeron un repaso rápido a algúns dos seus temas máis coñecidos (Orquesta, Restaurantes, Diego Tristán...), avanzaron o que é o primeiro tema do seu novo álbum, A quincena do Apóstol, e remataron, como acostuman, no medio do público para cantar Muinheira do interior.
Nese mesmo horario tamén se puido ver pola Illa das Esculturas a boa parte da corporación municipal, dende o alcalde, Miguel Anxo Fernández Lores, a practicamente todos os seus concelleiros: de Anabel Gulías a Pilar Comesaña.
Xa pola tarde, Queco Lago presentou o seu primeiro EP en directo coa súa banda e cun invitado sorpresa, o cociñeiro con estrela Michelin Pepe Solla. Tamén presentou en directo o seu último disco o pontevedrés Berto, que subiu ao escenario a Mariña Paz, coa que sacou un EP este mesmo ano. Berto protagonizou un concerto especialmente emotivo ao estar presente a súa familia, incluídos os seus avós. Igualmente xogaba na casa Cora Velasco, que chegou ao Surfing the Lérez apenas uns poucos días despois de actuar no festival compostelán O Son do Camiño. O último concerto do escenario instalado ao final da Illa das Esculturas foi o de The Rapants.
Volveron os picnics, volveron as familias e volveu o que é a esencia deste festival. A verdade é que sabe a gloria facer isto despois de dous anos e obter esta resposta do público.
Onte, a maiores, actuaron Copa Turbo, Playa Desmayo, Beti de la Church (no que foi o único cambio de última hora no cartel ao atoparse enferma Carlota Crey), Kings of the Beach e Elephants and Paw. No escenario infantil houbo obradoiros e xogos en distintos horarios ao longo de toda a xornada.
Finalmente, o escenario que estes días viñeron ocupando os DJ transformouse no escenario Bonobo. Alí actuaron, entre as 12.00 e as 20.30 horas de xeito ininterrumpido, grupos de alumnos e alumnas desta academia de artes pontevedresa, que conta entre os seus mestres con Gonzalo Maceiras (Furious Monkey House) ou Violeta Mosquera (Bala). A partir das 21.00 horas ocupárono artistas vinculados a esa mesma escola, como Thom Archi e Marinha DJ, e tamén volveron pinchar outros que xa pasaran polo evento como DJ Dinero.
O festival Surfing the Lérez recuperouse este mes de xuño, tras dous anos sen poder celebrarse a causa da pandemia, da man da produtora Jack-Jack e do Concello de Pontevedra. Comezou o xoves pola tarde e incluíu máis de 30 actuacións. integramente de artistas galegos, entre as que estiveron as de Ortiga, Heredeiros da Crus ou Dismal. O evento, que ten como patrocinadores principais a Deleite e Vibra Mahou, é de acceso libre e gratuíto e ten carácter solidario, ao recoller alimentos non perecedeiros para Redeaxuda.
