Volve o Entroido sen ningún tipo de restricións a Pontevedra. A concelleira de Festas, Carme da Silva, presentou este mércores a programación festiva, que dará comezo o 17 de febreiro e se prolongará ata o día 25 e que contará con varias novidades. As dúas máis importantes: a amplicación da Festa Pirata e a celebración dunha sesión vermú con todas as murgas.
- Sábado 11 de febreiro
- Venres 17 de febreiro
- Luns 20 de febreiro
- Martes 21 de febreiro
- Mércores 22 de febreiro
- Xoves 23 de febreiro
- Venres 24 de febreiro
"Chegou o Entroido máis agardado polos festeiros, a troula compartida, o primeiro que se vai poder celebrar como debe ser dende 2020", dixo a concelleira.
Sábado 11 de febreiro
Antes do comezo oficial da festa, como é habitual, haberá un anticipo en forma de pasarrúas polo centro histórico en homenaxe a un Entroido clásico. Neste caso será o dos follateiros de Lobios (Ourense). Será o sábado 11 de febreiro (17.00 horas).
Venres 17 de febreiro
O pregón do venres 17 de febreiro (21.00 horas), na Praza da Ferrería, servirá para dar comezo á programación oficial. Este ano correrá a cargo "dun grupo que participa activamente tanto no Entroido como na Feira Franca", Os do Pino. Ao día seguinte (dende as 17.00 horas) celebrarase o tradicional desfile, recuperando o percorrido habitual, dende José Malvar ata a Alameda. Tamén se recupera a festa final posterior na Ferrería (a partir das 20.00 horas).
Segundo contou Da Silva, outra das novidades do Entroido deste ano será o reparto dos premios na categoría das comparsas. "Mantense a dotación económica, pero repartirase de xeito diferente para que as oito agrupacións participantes teñan galardón", contou a concelleira, que lembrou "o enorme esforzo que fan estes colectivos por participar".
Luns 20 de febreiro
O luns 20 de febreiro (19.30 horas) chega o papagaio Ravachol á Praza da Peregrina. Alí quedará desvelado un dos misterios do Entroido pontevedrés: de que vai disfrazado. A Asociación Recriativa de Xeve será a encargada, un ano máis, da construción do animal e do seu disfraz. "Tras a experiencia do ano pasado, que funcionou tan ben entre o público, desta vez Ravachol volverá quedar instalado no espazo público, sempre que o tempo o permita".
O papagaio estará todo o que dure o Entroido na propia Peregrina. O mesmo luns (21.00 horas), no Pazo da Cultura, celebrarase a primeira semifinal do XXXI Concurso de Murgas. "Como viña sendo habitual xa, todos os que non poidan vela en vivo poderana seguir por streaming".
Martes 21 de febreiro
A xornada do 21 de febreiro será a dedicada á Festa Pirata. O Concello fixo un cambio substancial nesta actividade, que pasa de celebrarse a partir das 23.00 horas a facelo a partir das 20.00 horas e durante toda a noite. Así, como era habitual, haberá unha sesión infantil na Praza da Ferrería (17.00 horas) e despois (a partir das 20.00 horas) comezará o desembarco da tripulación do Burla Negra, capitaneado polo pirata Benito Soto, polo centro histórico, para enfrontarse aos exércitos franceses e ingleses.
"Este adianto no horario ten que ver, entre outras cousas, coa cantidade de nenos e nenas que sabiamos que querían participar na actividade e aos que se lles facía algo tarde". A Ferrería acollerá un baile pirata (21.00 horas) cun concerto a cargo do grupo Broken Peach. E, despois (23.00 horas), haberá pasarrúas pirata a cargo de distintas agrupacións por todo o centro.
Mércores 22 de febreiro
A Corrida da Rosa, no campo da festa de Cabaleiro (16.30 horas), dentro do que supón a recuperación do Entroido tradicional de Campañó, e a festa infantil no centro cultural de Monte Porreiro (17.30 horas) marcan a xornada do mércores 22 de febreiro, que tamén inclúe a celebración da segunda semifinal do Concurso de Murgas no Pazo da Cultura (21.00 horas).
Xoves 23 de febreiro
A final do certame do Concurso de Murgas no Pazo da Cultura terá lugar o xoves 23 de febreiro (ás 21.00 horas). Ese mesma xornada celebrarase outra das novidades da programación: unha festa na Pasarela da rúa 12 de novembro (17.30 horas).
Venres 24 de febreiro
O venres 24 de febreiro celebrarase a XXVI Mostra da Parodia. E o sábado 25 de febreiro o Entroido rematará en Pontevedra cunha xornada que incorporará unha sesión vermú na Paza da Verdura (12.30 horas) coa actuación de todas as murgas "xa sen as ataduras e os nervios do concurso". O cortexo fúnebre de Ravachol sairá da Praza da Verdura (21.00 horas) e rematará co velorio na Praza da Ferrería e a posterior queima do papagaio. A programación rematará cun baile no Centro Cultural do Burgo (22.30 horas).
Carme da Silva contou que o cartel do Entroido deste ano volveu correr a cargo do ilustrador pontevedrés Santiago Paredes, que xa realizara o do ano pasado. A concelleira tamén lembrou que a festa se completa en Pontevedra coas XI Xornadas sobre o Entroido de Galicia, que se celebrarán no antigo convento de Santa Clara, os días 24 e 25 de febreiro.
