Carmen Hermo, Gosia Trebacz, Isabell Seidel. Yolanda Dorda, Isabel Pintado, Xulio García Rivas, Alfonso Costa, Ricardo de Campos, Fil Valcárcel e Antón Sobral son os dez creadores que participan na segunda edición da proposta expositiva Fame cero. A mostra, respaldada pola Concellería de Benestar Social e inaugurada este luns, permanecerá instalada na rúa Daniel de la Sota ata comezos do mes de abril.
"Os artistas tamén temos que ter conciencia social", explicou Antón Sobral sobre a proposta. El, ademais de ter obra exposta, é o comisario desta iniciativa, que tivo unha primeira edición en 2019 e que se basea na exposición dunha serie de imaxes e de textos a través dos que se denuncia o problema da malnutrición a nivel mundial. "Porque hai fame en Somalia, pero tamén en Galicia e en Pontevedra. Por iso buscamos facer unha chamada de atención, porque isto xa non é noticia. Si que o é que morra xente en Ucraína, pero non que morra xente de fame".
"Hai fame en Somalia, pero tamén en Galicia e en Pontevedra. Por iso buscamos facer unha chamada de atención, porque isto deixou de ser noticia"
Sobral denunciou que a malnutrición segue a ser un grave problema internacional, pero que se mantén fóra do foco. "Sábese que se produce o dobre de comida no mundo da que necesita o conxunto da poboación, mentres 800 millóns de persoas pasan fame a diario. Bastaría con redistribuír eses alimentos, pero non se fai".
Fame cero busca sensibilizar á poboación sobre esta cuestión. "Porque en Pontevedra hai moita xente que pasa fame, pero tamén moita xente que é solidaria", dixo Sobral. Tanto el como o concelleiro de Benestar Social, Marcos Rey, quixeron render homenaxe en concreto ao recentemente falecido Gonzalo Diéguez, o Padre Gonzalo, responsable do comedor de San Francisco, "que agora mesmo dá de comer a unhas 150 persoas ao día", lembrou Rey. Ao tempo, segundo dixo, o Concello atende a unhas 96 familias en risco de exclusión social, "unhas 300 persoas". Rey tamén lembrou que o 28 de maio se celebra o Día Internacional Contra a Fame.