O Garaxe Hermético cambia as cousas

"As cousas van cambiar", di Kiko da Silva. O debuxante e director da escola de banda deseñada de Pontevedra O Garaxe Hermético explica que, cando puxo en marcha o centro, un dos seus obxectivos era fornecer o mercado editorial galego de autores e contidos propios. Estes días, os dous selos máis importantes de Galicia, Galaxia e Xerais, publican obras de banda deseñada de exalumnos da escola. Pablo Prado é o autor da adaptación da novela O derradeiro libro de Emma Olsen, de Berta Dávila, que lanza Galaxia. E Anémona de Río, da obra A proba de auga, que chega ás librerías da man de Xerais. "Cando abrín a escola e mencionaba eses obxectivos dicíanme que eran utópicos e aquí estamos hoxe", segue explicando o creador. "Houbera varios intentos anteriores por que existise un mercado de banda deseñada en Galicia, pero tímidos e non continuados. Que dúas editoriais como Galaxia e Xerais se impliquen na publicación de cómic, para públicos diferentes, non só o infantil, é moi importante".

Pablo Prado e Anémona de Río seguen os pasos doutros exalumnos como Fonso Barreiro, que xa conseguiran facerse un oco no sector editorial co seu traballo.

A proposta na que se involucrou o ourensán afincado en Ponteareas Pablo Prado (1987) é especialmente significativa porque adapta unha novela galega recente: O derradeiro libro de Emma Olsen, de Berta Dávila. "A min escribir imponme moito", conta o autor, que pasa o estado de alarma en Madrid. "Así que cando buscaba unha idea para o meu proxecto de fin de estudos na escola, Kiko [da Silva] faloume da posibilidade de adaptar unha obra. Deume a ler esta novela e acabei fascinado. Contactamos con Berta [Dávila], que foi súper xenerosa con nós, e acabamos presentándolle o proxecto a Galaxia".

Prado explica que enfrontarse á adaptación dun título recoñecido como este (VII Premio de Narrativa Breve Repsol 2013 e Premio da Asociación de Editores como Mellor Libro de Ficción do mesmo ano, entre outros) foi un reto para el. "Pero, a verdade é que conectei moi ben con esta historia dende o principio. Era un texto que espertaba en min unha serie de emocións, de sensacións. Esa tensión dunha muller que trata de contar algo e non é quen de facelo gustoume e apetecíame traballar sobre solucións plásticas para ela".

"Cando montei a escola dicíanme que obxectivos coma este eran utópicos e aquí estamos", di Kiko da Silva

O autor recoñece que para el persoalmente, O Garaxe Hermético supuxo "un antes e un despois". "Para mín entrar na escola foi como unha explosión", di. "Entrei como afeccionado á lectura de comics e como persoa que debuxaba como autoterapia ou por hobby e acabei adicándome a isto. Para min foi un luxo e unha oportunidade fantástica. Creo que o papel da escola á hora de tecer redes vai ser fundamental".

JOSEFINA ARRUTI. Ademais de publicar O derradeiro libro de Emma Olsen, Pablo Prado está a punto de lanzar, xunto a Kiko da Silva, o cómic Os berros da motocicleta, un traballo que repasa a biografía de Josefina Arruti, muller do que fora alcalde de Pontevedra e presidente da Deputación, Bibiano Fernández Osorio-Tafall. "É un proxecto moi chulo e emocionante que estamos desexando que vexa a luz".

A maiores, o autor aproveitou o confinamento para rematar, xunto a Miguel Rojo, outro exalumno do Garaxe Hermético, un par de títulos dun proxecto de bd infantil.