A galega Guadi Galego, nun concerto especial con convidados, a banda valenciana La Habitación Roja, referencia do indie español, e os estadounidenses, The Posies, un dos grupos máis influíntes dos anos 90, actuarán este ano en Pontevedra dentro do ciclo As Matinés do Principal. A primeira farao o 7 de abril, os segundos o 5 de maio e os terceiros o 6 de outubro.
A concelleira de Cultura, Carme Fouces, e Carlos Montilla, da produtora I-Radia Crea, presentaron a segunda edición desta proposta, "pioneira en Galicia", segundo dixeron, que aposta por programar concertos de artistas pop e rock as fins de semana nun horario de mañá (12.30 horas), coa intención de arrastrar un público de carácter familiar.
Como o ano pasado, a organización completará a proposta involucrando á hostelería local, que acollerá catas, sesións vermú e encontros cos artistas. As entradas están á venda dende o 27 de febreiro en ticketea.com e ataquilla.com